საქართველოს პრეზიდენტი, გიორგი მარგველაშვილი ლატვიის პრეზიდენტს შეხვდა. შეხვედრის შემდეგ ერთობლივი პრესკონფერენცია გაიმართა. სიტყვით გამოსვლისას, მარგველაშვილმა იმ საკითხებზე ისაუბრა, რომელიც ლატვიელ კოლეგასთან განიხილა:

„ჩემთვის დიდი პატივია ვუმასპინძლო ლატვიის რესპუბლიკის პრეზიდენტს. უაღრესად მნიშვნელოვანია, რომ ეს ვიზიტი განხორციელდა დღეს, მაშინ, როდესაც ჩვენი ქვეყნის წინაშე დადგა კიდევ ერთხელ მწვავედ საკითხი ჩვენი სახელმწიფოებრიობის სუვერენიტეტისა და მისი განმტკიცების, მაშინ როდესაც რუსეთმა გადადგა კიდევ ერთი უხეში ნაბიჯი საქართველოს ტერიტორიული მთლიანობის მიმართ და ოკუპირებული აფხაზეთის მიმართ შეიქმნა ხელშეკრულება, რომელსაც ფაქტობრივად ეს ოპკუპაცია ანექსიამდე მიჰყავს. ეს ვიზიტი ხაზგასასმელია იმიტომ, რომ ჩვენ ვხედავთ მეგობრობას და მხარდაჭერას.

მინდა მადლობით აღვნიშნო აგრეთვე ის, რომ ბალტიის ასამბლეა იყო ის ვინც, ეს ე.წ. ხელშეკრულება დაგმო. კიდევ ერთხელ ვუხდი მადლობას ჩვენს კოლეგებს ლატვიიდან.

ჩვენ შეხვედრაზე საგანგებო ყურადღება ბალტიის ქვეყნებისა და შავი ზღვის აუზებს შორის თანამშრომლობას დავუთმეთ. მნიშვნელოვანია ის პროცესი, რომელსაც საქართველო ავითარებს რეგიონში, როგორც ტრანზიტული ქვეყანა. ამ პროცესის კიდევ უფრო გაღრმავება არის ძალიან მნიშვნელოვანი.

მნიშვნელოვანი ნაწილი ჩვენი შეხვედრისა დაეთმო ლატვვიის, როგორც მომავალ წელს ევროკავშირის თავმჯდომარე ქვეყნის როლს. ვისაუბრეთ იმ შთამბეჭდავ ორმხრივ ურთიერთობებზე, რომლებსაც კიდევ დიდი პოტენციალი აქვთ გაღრმავებისა. პოლიტიკური ფორმატი არის განსაკუთრებით წარმატებული, როგორც ორმხრივ ფორმატში ნათლად ჩანს, მაგრამ ძალიან მნიშვნელოვანია, რომ ეს ფორმატები კიდევ უფრო გაფართოვდეს. ხელი ეწერება ხელშეკრულებებს, საგარეო, ჯანდაცვისა და სოფლის მეურნეობის სამინისტროებთან“, - განაცხადა გიორგი მარგველაშვილმა.