„ერთიანი ნაციონალური მოძრაობის“ წევრის, გოკა გაბაშვილის განცხადებით, საქართველოს ხელისუფლება ცდილობს რუსეთთან არსებული პრობლემების გადაჭრის მცდელობაში, საერთაშორისო თანამეგობრობა ჩამოიშოროს. საპარლამენტო უმცირესობის წევრმა, ტელეკომპანია „რუსთავი 2“-ის გადაცემა „არჩევანში“ პაატა ზაქარეიშვილის განცხადებებს ბოდვა უწოდა:

„შოკის მომგვრელია, როცა საქართველოს სახელმწიფო მინისტრი ზის და სად არის წასული, რა არგუმენტები მოჰყავს? აბსოლუტურად თვითკმაყოფილი აცხადებს, რომ ეს ყველაფერი წარმატებული პოლიტიკაა. ამბობს, რომ რუსეთი ანექსიას ახორციელებს იმიტომ, რომ ჩვენი პოლიტიკა არის წარმატებული.გეტყვით რა არის ამ პოლიტიკის შედეგი, საქართველოს მთავრობა ცდილობს საქართველოს საკითხი გაქრეს საერთაშრისო არენიდან, რომ საქართველომ არ შეუქმნას დისკომფორტი რუსეთს, ჩვენ ვსაუბრობთ ძალიან კონსტრუქციულად თურმე სხვადასხვა საკითხებზე, ამაზე პრემიერმინისტრი საუბრობს, იმის მაგივრად, რომ შეეცადო საერთაშორისო საზოგადოება გვერდით დაიყენო და ეცადო რუსეთმა დიდი პოლიტიკური საფასური მაინც გადაიხადოს.

ეს არის ის შედეგი, რომელიც მივიღეთ ორი წლის განმავლობაში. მაშინ, როდესაც ამერიკას გადატვირთვის პოლიტიკა ჰქონდა, ამ პერიოდშიც კი არ ახსენეს საქართველო. ყველაფერი შეწყდა, ყველგან საქართველომ პირში წყალი დაიგუბა. რაში ვართ კონსტრუქციულები? იმაში, რომ ზაქარეიშვილი გვიხსნის, რომ არაფერი მომხდარა? თურმე სანამ ხელშეკრულება არ გაფორმდებოდა, არანაირი პანიკის საფუძველი არ იყო.

ორი წლის წინ შემეძლო დამეჯერებინა, რომ ეს არის გულუბრყვილობა, ნაივობა, მთავრობა მოვა და შეცვლის რაღაცას, ეს ორი წლის წინ შესაძლოა იყო მიამიტობა, ლაქუცის მცდელობა, რომ ჯაშუშები გამოვუშვათ, პრობლემები არ შევუქმნათ, ორი წლის წინ შეიძლება ეს ვიღაცას დაეჯერებინა, მაგრამ დღეს ყველა ხედავს, რომ ეს არის განწირული გზა, დღევანდელი განცხადება პრემეირმინისტრისა, რომ პოლიტიკა რჩება იგივე, ნიშნავს იმას, რომ არ გვჭირდება საერთაშორისო თანამეგობრობის დახმარება. დღეს ჟენევის ფორმატის დასუსტება და მოტყუება იმისა, რომ ჩვენი ურთიერთობა ნორმალური გზით მიდის, არის აბსურდი. ზაქარეიშვილის შეფასებას მე ბოდვას ვუწოდებ“, - განაცხადა გოკა გაბაშვილმა.