მერამდენედ უნდა ჩავარდეთ ერთსა და იმავე ორმოში !

მერამდენედ უნდა ჩავარდეთ ერთსა და იმავე ორმოში ! - დიმიტრი შაშკინი

სოც.მედია - 22:42, 25 Nov, 2014

1512

ეს არის ამონარიდი სტატიიდან, რომელიც 2 წლის წინ დავწერე. მაშინ მთავრობა რუსეთთან ინტენსიურად “ალაგებდა” ურთიერთობებს - თავდაცვის ყოფილი მინისტრი,,ფისბუქის“ გვერდზე რამდენიმე თვის წინ რუსეთთან დაკავშირებით მის მიერ გაკეთებულ შეფასებას იხსნებს - ,,არ მიხარია, რომ მართალი ვიყავი, მაგრამ მერამდენედ უნდა ჩავარდეთ ერთსა და იმავე ორმოში !!!!!!!!!!!!!“.

,,რუსეთი სცემს პატივს მხოლოდ ძალას.

უინსტონ ჩერჩილს ეკუთვნის ფრაზა: „მიამიტია ის, ვისაც სჯერა, რომ რუსეთი რამეს პატივს სცემს, ძალის გარდა“. რუსეთის იდეოლოგიის კუთხით ამ სიტყვების შემდეგ არაფერი შეცვლილა. საერთოდ, რომ გავაანალიზოთ რუსეთის ბოლო სამი საუკუნის ისტორია, დავინახავთ, რომ ამ ქვეყანაში იდეოლოგიური კომპონენტი არ იცვლება. იცვლება წყობა, ლიდერები, მაგრამ არა სახელმწიფო იდეა. რონალდ რეიგანმა საბჭოთა კავშირს ბოროტების იმპერია უწოდა. მაშინ და ახლაც რუსეთის პოლიტიკური ელიტა საკუთარ მოსახლეობას არწმუნებს, რომ დასავლეთი და ყველა, ვინც იზიარებს დასავლურ ფასეულობებს, მათი მტერია. ეს არის ამ იმპერიის მთავარი იდეოლოგია. რუსეთის ლიდერები ვერ სთავაზობენ თავის საზოგადოებას კეთილდღეობასა და დემოკრატიას, როგორც მაგალითად, აშშ ან საფრანგეთი, მაგრამ მათ კარგად ესმით, რომ ხალხს სჭირდება სახელმწიფო იდეა და საუკუნეების განმავლობაში რუსეთის სახელმწიფო იდეა ის არის, რომ დასავლეთი მათი მტერია და რუსეთისთვის გადარჩენის ერთადერთი გზა სხვების დაჩაგვრაა. ეს იყო სახელმწიფო იდეა მეფის რუსეთში, საბჭოთა კავშირში და ახლაც არის. მე-20 საუკუნის პოლიტიკური მამები ამას ხედავდნენ და ყველაფერს აკეთებდნენ, რომ რუსეთის იმპერიული ამბიცია გარკვეულ ჩარჩოებში ჩაკეტილი ყოფილიყო. თუმცა ახლა ამ იდეამ ახალი ძალით იფეთქა, შეინიღბა ეკონომიკით და დასავლური სამყაროსთვის, განსაკუთრებით რუსეთის მეზობლებისთვის, საშიშროებას წარმოადგენს.

რუსეთი აზიური ქვეყანაა, ქვეყანა სადაც მოწინააღმდეგის კეთილი ნება და დათმობა ყოველთვის აღიქმება, როგორც სისუსტე და სრული განადგურების ნიშანი. სანამ რუსეთის სახელმწიფოებრივი იდეა არ შეიცვლება, ის ჩვენი ქვეყნის მთავარი საფრთხე და მტერი იქნება. რუსეთის მიერ აფხაზეთის და ცხინვალის ოკუპაცია ამ იდეის შედეგია. საუკუნეების განმავლობაში რუსეთის მოსახლეობას მისი ლიდერები არწმუნებდნენ, რომ მოსკოვი უნდა ყოფილიყო მესამე რომი, რუსეთი კი - ახალი ბიზანტიის იმპერია. ეს იდეა რუსეთის მოქალაქეების სისხლში და ხორცშია ჩამჯდარი. ამის მაგალითია ის, რომ ომს საქართველოს წინააღმდეგ რუსეთის მოსახლეობის აბსოლუტური უმრავლესობა უჭერდა მხარს“, - ამონარიდი შაშკინის ინტერვიუდან.