რუსეთ-აფხაზეთის ხელშეკრულებასთან დაკავშირებით პარლამენტი რეზოლუციის ორ ვარიანტზე მუშაობს

პოლიტიკა - 20:28, 25 Nov, 2014

1392

საქართველოს პარლამენტი რეზოლუციის პროექტზე მუშაობს, რომლის სახელწოდებაცაა „რუსეთის მიერ ოკუპირებული ტერიტორიების ანექსიის მცდელობა“. პროექტი ნაციონალურმა მოძრაობამ მოამზადა. რეზოლუციის პროექტის მიხედვით პარლამენტმა მთავრობას ანექსიის წინააღმდეგ კონკრეტული რეკომენდაციებით უნდა მიმართოს.

რეზოლუციის პროექტი ცხრა პუნქტისგან შედგება, ერთ-ერთი პუნქტის მიხედვით საქართველო უნდა შეუერთდეს რუსეთის წინააღმდეგ დაწესებულ სანქციებს, გარდა ამისა საუბარია აბაშიძე-კარასინის ფორმატის გაუქმებაზეც. ასევე საუბარია იმაზეც, რომ საქართველოს დიპლომატიურმა კორპუსმა და ხელისუფლებამ უნდა მოამზადოს სამართლებრივი საფუძვლები იმისთვის, რომ საქართველომ დამატებითი საქმეების აღძვრა მოახდინოს საერთაშორისო სასამართლოებში.

გავრცელებული ინფორმაციით მმართველ გუნდშიც შემუშავდა რეზოლუციის ალტერნატიული პროექტი, რომელიც „ნაციონალური მოძრაობის“ მიერ მომზადებული ვარიანტისგან მნიშვნელოვნად არ განსხვავდება.

გიორგი კანდელაკის განცხადებით, აღნიშნული რეზოლუცია იქნება ტესტი პარლამენტის წევრებისთვის, სურთ მათ ემსახურონ საქართველოს თუ სურთ იყვნენ ბიძინა ივანიშვილის მონები.

„თავისუფალი დემოკრატების“ წევრის ვიქტორ დოლიძის განცხადებით კი უმრავლესობის და „ნაციონალური მოძრაობის“ მიერ მომზადებული რეზოლუციების შინაარსი ერთმანეთისგან ნიშანდობლივად არ განსხვავდება და იმედი გამოთქვა რომ კონსესუსის საფუძველზე შესაძლებელი გახდება ერთიანი დოკუმენტის მიღება.

უმრავლეოსობის წევრის ზვიად კვაჭანტირაძის თქმით, უმრავლესობა მზადაა სოჭში გაფორმებულ ხელშეკრულებას ადეკვატური რეზოლუციით გამოეხმაუროს.

აფხაზეთის საკითხის განხილვა პარლამენტში დარბაზის უქონლობის გამო მოგვიანებით და სხვა დარბაზში დაიწყო. ამის შესახებ საკანონმდებლო ორგანოდან ”კურიერის” კორესპოდენტი იუწყება. დარბაზში, სადაც ევროპასთან ინტეგრაციისა და საგარეო ურთიერთობათა კომიტეტების გაერთიანებული სხდომა უნდა გამართულიყო, პარლამენტის "ადამიანის უფლებათა დაცვის კომიტეტის" სხდომა მიმდინარეობს. რუსეთის მიერ აფხაზეთთან გაფორმებული შეთანხმებაზე პარლამენტს დღეს 18:30-ზე უნდა ემსჯელა, თუმცა სხდომის მონაწილეები ნახევარ საათზე მეტი დერეფანში ელოდებოდნენ დარბაზის გათავისუფლებას. საკმაოხნიანი ლოდინის შემდეგ კი სხდომა სხვა დარბაზში დაიწყო.

საპარლამენტო უმცირესობას დეპუტატი გიორგი კანდელაკი და საქართველოს ყოფილი ელჩი ევროსაბჭოში ზურაბ ჭიაბერაშვილი წარმოადგენენ.