ნათელაშვილმა რუსეთის მიერ ოკუპირებულ აფხაზეთთან ეგრეთ წოდებული ხელშეკრულების გაფორმებას გამოეხმაურა და ეს ფაქტი საერთაშორისო მეკობრეობად შეაფასა.

„ჩადენილია საერთაშორისო მეკობრეობის უპრეცედენტო აქტი რუსეთის ფედერაციის ხელმძღვანელობის მხრიდან. ყველაფერ ამის გამომწვევი მიზეზი გახლავთ საქართველოს დღევანდელი ხელისუფლების უნიათო, უპრინციპო და უკბილო პოლიტიკა, რაც დაკავშირებულია ქვეყნის ტერიტორიული მთლიანობის უგულებელყოფასთან, მცონარობასთან, უპასუხისმგებლობასთან. ყველაფერს ამას დაამთავრებს მხოლოდ და მხოლოდ ახალი არჩევნები, ახალი მთავრობა და ახალი პოლიტიკური კურსი.

ჩვენ მზად ვართ ავიღოთ პასუხისმგებლობა ამ დამანგრეველი პროცესების შეჩერებაზე, ჩვენ შეგვიძლია, დაველაპარაკოთ სამყაროს ოთხივე მხარეს - ჩრდილოეთსაც, სამხრეთსაც, დასავლეთსაც და აღმოსავლეთსაც, რადგან ყველგან მიგვესვლება და ყველგან შეგვიძლია ქვეყნის ინტერესების დასაცავად ვთქვათ ძალიან სერიოზული სიტყვა.

მოვუწოდებთ რუსეთის წამყვან პოლიტიკურ პარტიებს, შევქმნათ ორ ქვეყანას შორის ინტერპარტიული საბჭო, სადაც წამყვანი პოლიტიკური პარტიები ორივე მხრიდან, დასხდებიან და დაიწყებენ კონსულტაციებს ორ ქვეყანას შორის ურთიერთობათა ამ საშინელი ჩიხიდან გამოსაყვანად“, - განაცხადა ნათელაშვილმა.

შეგახსენებთ, რომ ოკუპირებულ აფხაზეთსა და რუსეთს შორის სტრატეგიული პარტნიორობისა და მოკავშირეობის ხელშეკრულებას ხელი გუშინ, მოეწერა.