„თავისუფალი თაობის“ ლიდერის ლადო სადღობელაშვილის მოთხოვნას „სააკაშვილის საპრეზიდენტო ბიბლიოთეკის“ დახურვასთან დაკავშირებით ბიბლიოთეკის გამგეობის თავმჯდომარე ანდრო ბარნოვი ეხმაურება.

როგორც „ნიუპოსტთან“ საუბრისას ბარნოვმა აღნიშნა, ლადო სადღობელაშვილიც და სხვებიც, ვისაც მსგავსი მოთხოვნა აქვთ, ხელისუფლებისგან არიან მართულები.

„ჯერ ერთი, რომ ბიბლიოთეკაში არც ერთი რუსული წიგნი არ არის. ძირითადად, ინგლისური და ქართული ლიტერატურა გვაქვს. არავის ეპარება ეჭვი, რომ ეს ხალხი მართულია ჩვენი ხელისუფლებისგან. ისინი ცდილობენ, რომ ააგორონ ზიზღი. მათ ეს კარგი სტრატეგია ჰგონიათ, მაგრამ სინამდვილეში ზიზღი უკან უბრუნდებათ და შეუძლიათ საზოგადოებაში დამოკიდებულებები კარგად მოიკითხონ. რაც შეეხება, ბიბლიოთეკას, ეს არანაირი პოლიტიკური ორგანიზაცია არ არის. ჩვენ დაკავებული ვართ განათლებით, აქ ტარდება ლექციები, გვაქვს ბევრი კარგი წიგნი, მათ შორის ისეთები, რომელსაც სტუდენტები უნივერსიტეტის ბიბლიოთეკაში ვერ ნახულობენ. ამ ბიბლიოთეკით ბევრი სარგებლობს და სწორედ ეს არის მათი გაღიზიანების საფუძველი. ეს არის უსუსური ხელისუფლება, რომელმაც ვერ მოახერხა, რომ ქვეყნის სასარგებლო პროექტი განეხორციელებინა. სიმართლეა ის, რომ სააკაშვილის საპრეზიდენტო ბიბლიოთეკა დღემდე არის ერთადერთი მნიშვნელოვანი პროექტი, რომელიც ქვეყანაში განხორციელდა“, - განუცხადა „ნიუპოსტს“ ბარნოვმა.

„თავისუფალი თაობის“ ლიდერი ლადო სადღობელაშვილი სააკაშვილის საპრეზიდენტო ბიბლიოთეკის დახურვას ითხოვს. მისი თქმით, ბიბლიოთეკის 80 % რუსული წიგნებით არის დაკომპლექტებული. როგორც სადღობელაშვილი ამბობს, ბიბლიოთეკის გაუქმების მოთხოვნით აქციების დაწყებას აპირებენ.