საარჩევნო გარემოს გაუმჯობესებაზე მომუშავე ინტერპარტიული ჯგუფი პარლამენტის თავმჯდომარეს ხვდება.

არასაპარლამენტო ოპოზიციის აზრით, საკანონმდებლო ორგანო პროპორციული წესით არჩეული 150 წევრისგან უნდა შედგებოდეს.

სწორედ მათ მიერ შემუშავებულ ცვლილებებს გაეცნობა დავით უსუფაშვილი.

„მიგვაჩნია, რომ ფორმულა არსებობს მარტივი, რომელიც გამოასწორებს შექმნილ მდგომარეობას. ჩვენ ვამბობთ, რომ რამდენ პროცენტსაც მიიღებს კონკრეტული სუბიექტი, იმდენი პროცენტი მიიღოს მანდატების, რადგან საზოგადოების პოლიტიკური განწყობები სრულად აისახოს პარლამენტსა და საკრებულოში“, - აცხადებს „ახალი მემარჯვენეების“ ლიდერი.

„ქართული დასის“ ლიდერის ჯონდი ბაღათურიას თქმით, თუ შეთანხმება შედგა პარლამენტში 80%-იანი უმრავლესობა აღარ იარსებებს.

„თუ ამ შეთანხმებას მივაღწიეთ, ასეთ შემთხვევაში პარლამენტში აღარასოდეს აღარ იქნება 80%-იანი უმრავლესობა, რომელიც პრემიების, სახელფასო დანამატების და პირადი კეთილდღეობის მოწყობაზე ზრუნავს. აღარასოდეს არ იქნებიან პარლამენტში პარაზიტებად გადაქცეული ფეოდალები“, - განაცხადა ჯონდი ბაღათურიამ.