რუსეთ-სომხეთის რკინიგზის აღდგენაზე ვლადიმერ პუტინის მიერ გაკეთებული განცხადების გამო „თავისუფალი დემოკრატების“ ერთ-ერთი ლიდერი ალექსი პეტრიაშვილი საქართველოს ხელისუფლებისგან მკაფიო პასუხს ითხოვს.

ამის შესახებ პეტრიაშვილი „ფეისბუქის“ პირად გვერდზე წერს.

პეტრიაშვილს აინტერესებს, თუ რას გულისხმობდა ბერუჩაშვილი, როდესაც თქვა, რომ აღნიშნულთან დაკავშირებით გადაწყვეტილება ქართული სახელმწიფოს ინტერესებიდან გამომდინარე იქნება მიღებული.

„აფხაზეთი, საქართველოს გავლით რუსეთ-სომხეთის რკინიგზის აღდგენაზე ვლადიმერ პუტინის შეთავაზებაზე მკაფიო პასუხს ვითხოვთ საქართველოს ხელისუფლებისგან!

რას გულისხმობს ქალბატონი თამარ ბერუჩაშვილი, რომ ქართული სახელმწიფოს ინტერესებიდან გამომდინარე მივიღებთ გადაწყვეტილებას? ორაზროვნების დრო ნამდვილად არ არის. რაც მალე ჩამოაყალიბებთ ღიად პოზიციას რკინიგზასთან დაკავშირებით, მით უკეთესი საქმისთვის!

რას გულისხმობს ბატონი ზურაბ აბაშიძე, როდესაც ამბობს, რომ უნდა ვუპასუხოთ ისტერიის გარეშე, მაგრამ პრინციპულად? გთხოვთ, დააკონკრეტეთ პოზიცია ბატონო ზურაბ, რკინიგზასთან დაკავშირებით!

და რაც მთავარია, მივმართავ საქართველოს პრემიერ მინისტრს, გამოხატოს საკუთარი პოზიცია რკინიგზასთან დაკავშირებით! ცხადად და მკაფიოდ!

ჩვენ, "თავისუფალი დემოკრატები", ხელისუფლებაში ყოფნის დროსაც პრინციპულად წინააღმდეგი ვიყავით და ახლაც!“, - წერს ალექსი პეტრიაშვილი.