საქართველოს პრეზიდენტი აფხაზეთსა და რუსეთს შორის თანამშრომლობის ე.წ. დოკუმენტის გაფორმებას გამოეხმაურა.

როგორც საგანგებო ბრიფინგზე გიორგი მარგველაშვილმა განაცხადა, აღნიშნული დოკუმენტი რუსეთის მხრიდან საქართველოს ანექსიისკენ გადადგმული ნაბიჯია,

„ეს ნაბიჯი ახალ გამოწვევას უქმნის საქართველოს. აფხაზეთის ანექსიისკენ გადადგმული ნაბიჯი სამხედრო, სოციალურ, ეკონომიკურ და პოლიტიკურ სივრცეში აერთიანებს დამოუკიდებელ საქართველოს ტერიტორიას და მას რუსეთის ნაწილად აქცევს. ხელშეკრულება არღვევს საერთაშორისო თანამეგობრობის ნორმებს. ჩვენ უნდა გავიაზროთ ის, რომ ამ საკითხზე ადექვატური პასუხის მიღების გარეშე რუსეთის ექსპანსიონისტურ პოლიტიკას მომავალი ექნება. ამ პოლიტიკას უნდა ჰქონდეს წინააღმდეგობა. მოვუწოდებთ, საერთაშორისო თანამეგობრობას, რომ ამ პოლიტიკის ირგვლივ გაერთიანდეს. აუცილებელია მოწვეული იქნას გაეროს უშიშროების საბჭო, სადაც აღნიშნული საკითხი იქნება განხილული. ასევე, ეუთოს, ევროკავშირის, ნატოსა და სხვა ფორუმებზე უნდა წამოიწიოს ეს საკითხი“, - განაცხადა პრეზიდენტმა.

გიორგი მარგველაშვილის თქმით, აღნიშნულ საკითხზე ის კონსულტაციებს არასაპარლამენტო პოლიტიკურ პარტიებთან და არასამთავრობო სექტორის წარმომადგენლებთან გეგმავს.

„მოვუწოდებ, ამ მიზნით გაერთიანდნენ პოლიტიკური პარტიები, სამოქალაქო საზოგადოება, პოლიტიკური ორგანიზაციები და ერთიანად გამოვიყენოთ ყველა ის პლატფორმა, რომლის მეშვეობით შევძლებთ ამ თემაზე ხმამაღლა ვისაუბროთ. პოლიტკური ძალების და საზოგადოების კონსენსუსის შედეგად შეგვიძლია გავიაზროთ და ახალი წინადადებებით ვილაპარაკოთ იმ პრობლემებზე, რასაც წარმოადგენს ოკუპირებული ტერიტორიები. აქედან გამომდინარე, ვიწყებ კონსულტაციებს არასაპარლამენტო პოლიტიკურ ძალებთან და არასამთავრობო ორგანიზაციებთან, იმ საკითხთან დაკავშირებით, თუ როგორ ვიმოქმედოთ ერთობლივარ ამ პრობლემის დასაძლევად“, - განაცხადა პრეზიდენტმა.