საქართველოს საგარეო საქმეთა სამინისტროში აფხაზეთსა და რუსეთს შორის ე.წ სტრატეგიული თანამშრომლობის შესახებ ხელშეკრულების გაფორმებასთან დაკავშირებით საგანგებო ბრიფინგი გაიმართა.

მედიისთვის განცხადება უწყების ხელმძღვანელმა თამარ ბერუჩაშვილმა გააკეთა. მინისტრმა საერთაშორისო თანამეგობრობას ამ ფაქტის დაგმობისკენ მოუწოდა და განაცხადა რომ ამ ხელშეკრულების გაფორმება არის საქართველოს ტერიტორიის ანექსია. ბერუჩაშვილის განცხადებით სამინისტრო იმუშავებს საერთაშორისო საზოგადოებასთან იმ მიმართულებით, რომ მოწვეული იქნას გაეროს უშიშროების სხდომა. მინისტრის თქმით, ამასთან დაკავშირებით გაეროში მოთხოვნა უკვე გაგზავნილია.

"გაეროში უკვე მოვითხოვეთ უშიშროების საბჭოს სხდომის ჩატარება. ეუთოში უკვე მოვითხოვეთ სპეციალური მუდმივი საბჭოს სხდომის ჩატარება. ამ საკითხს ჩვენ დავსვამთ აქტიურად ევროკავშირში, ევროსაბჭოსა და ნატოში. იგეგმება ვიზიტები დედაქალაქებში. უკვე განხორციელდა სატელეფონო საუბრები ჩვენს პარტნიორებთან. ე.წ. ხელშეკრულების საკითხს საქართველო მწვავედ დაყენებს ჟენევის მოლაპარაკებების ფარგლებში 10 დეკემბერს. როგორც მრავალმხრივ, ასევე ორმხრივ ფორმატში საქართველო მტკიცედ სთხოვს საერთაშორისო პარტნიორებს, დაგმონ ე.წ. ხელშეკრულება და მოუწოდონ რუსეთის ფედერაციას, ხელი აიღოს საერთაშორისო სამართლის წინააღმდეგ მიმართული ქმედებებისგან.

მოკავშირეობისა და სტრატეგიული თანამშრომლობის შესახებ ე.წ ხელშეკრულების ხელმოწერა წარმოადგენს რუსეთის ფედერაციის მიერ აფხაზეთის რეგიონის დე ფაქტო ანექსიისკენ გადადგმულ ნაბიჯს, საქართველოს მთავრობა გმობს ამ უკანონო ნაბიჯს და მოუწოდებს საერთაშორისო თანამეგობრობას სათანადო შეფასება მისცეს საქართველოს ტერიტორიულილ მთლიანობისა და საერთაშორისო სამართლის ფუნდამენტალური პრინციპების წინაარმდეგ მიმართულ ქმედებას.

ე.წ დოკუმენტი წარმოადგენს რუსეთის მიერ 2008 წლის 12 აგვისტოს ცეცხლის შეწყვეტის შესახებ ხელშეკრულებით ნაკისრი ვალდებულების უხეშ შელახვას, მის ხელმოწერას ექნება ნეგატიური შედეგები საქართველოს ოკუპირებულ ტერიტორიებზე უსაფრთხოების მდგომარეობაზე, ისევე როგორც უფრო ფართოდ ევროპული უსაფრთხოების კონტექსტში.

ამ ე.წ ხელშეკრულებას არავითარი სამართლებრივი საფუძველი არ გააჩნია და შესაბამისად მას არასდროს არ ცნობს საერთაშორისო თანამეგობრობა. მიუხედავად ამისა ჩვენ მოუწოდებთ საერთაშორისო პარტნიორებს დაგმონ კიდევ ერთხელ ეს ქმედება.“- განაცხადა საგარეო საქმეთა მინისტრმა თამარ ბერუჩაშვილმა.