რუსეთი აფხაზეთის დახმარების მოცულობას ორჯერ გაზრდის, ამის შესახებ განცხადება რუსეთის პრეზიდენტმა ვლადიმერ პუტინმა აფხაზეთის ე.წ პრეზიდენტთან შეხვედრის დროს განაცხადა. „იგეგმება დახმარების გაორმაგება, წინა წელთან და შესაძლოა მიმდინარე წელთან შედარებითაც“- აღნიშნა პუტინმა.

პუტინის განცხადებით რუსულ-აფხაზური ურთიერთობები წარმატებულად ვითარდება და ამისთვის კარგი ნორმატიულ-სამართლებრივი ბაზაა შექმნილი.

„ამასთანავე , ჩვენი ექსპერტები და პარლამენტის წევრები მივიდნენ დასკვნამდე, რომ აუცილებელია დამატებითი აქტების მიღებაც, რომ გაუმჯობესდეს ეკონომიკური ურთიერთობები, უზრუნველვყოთ აფხაზეთის უსაფრთხოება და გადავწყვიტოთ მთავარი ამოცანა- გავაუმჯობესოთ ადამიანების ცხოვრების დონე.“- განაცხადა პუტინმა.

აფხაზეთის ე.წ მეთაურმა აღნიშნა , რომ მისი ქვეყანა დიდი ხნის განმავლობაში განიცდიდა მრავალ სირთულეს, დღეს კი ხელშეკრულების გაფორმებით ქვეყანა ახალ ფაზაში გადადის.

„ჩვენ უეჭველად გავზრდით იმ შესაძლებლობებს, რაც ადრე იყო წარმოდგენილი- როგორც უსაფრთხოებაში, ასევე სოციალურ-ეკონომიკური განვითარების საკითხებთან დაკავშირებით. ჩვენ ვიმედოვნებთ რომ ეს ურთიერთობები განვითარდება და დახმარება რომელსაც ჩვენ ქვეყანას აღმოუჩენენ, იქნება რეალურად სასარგებლო ჩვენი ქვეყნისთვის“- აღნიშნა ხაჯიმბამ. მისი თქმით, რუსეთის მხრიდან დახმარების მოცულობის გაზრდა აფხაზეთს საშუალებას მისცემს, არა მხოლოდ სოციალური ამოცანები გადაწყვიტოს, არამედ ეკონომიკაც განავითაროს.