დევნილთა მინისტრის სოზარ სუბარის ინფორმაციით, საქართველოში თავშესაფრის ბევრი მაძიებელი თუ ლტოლვილი მოდის.

ამის შესახებ სუბარმა გაზეთ "კვირის პალიტრასთან" ინტერვიუში განაცხადა.

მისი თქმით, თავშესაფრის მაძიებლები მოდიან ერაყიდან და სირიიდან, ასევე უკრაინიდან.

"საქართველოში ბევრი თავშესაფრის მაძიებელი თუ ლტოლვილი მოდის ერაყიდან და სირიიდან – არიან ქურთები, იეზიდები, არაბები. გვყავს ლტოლვილები უკრაინიდანაც. როცა ჩვენვე ათასობით დევნილი გვყავს, ცოტა ძნელია მათი დაკმაყოფილება, თუმცა, შეძლებისდაგვარად ვეხმარებით ლტოლვილებს ბინების დაქირავებაში, ვაძლევთ თავშესაფარს მარტყოფში. აშშ-ის დახმარებით შენდება ლტოლვილთა ახალი თავშესაფარი, 120 კაცზე გათვალისწინებული კორპუსი", - აცხადებს მინისტრი.

მისი თქმით, ადგილობრივ დევნილებზე მთავარ პრობლემად კვლავ მათი საცხოვრებელი სახლებით უზრუნველყოფა და მათი დასაქმების ხელშეწყობა რჩება.

"როდესაც სამინისტროში მოვედი, დამხვდა სტატისტიკა, რომ დაახლოებით 56 000 ოჯახია ბინით დასაკმაყოფილებელი. დასახლების გარდა, დევნილებში მწვავედ დგას დასაქმების პრობლემა. შექმნილია საჯარო სამართლის იურიდიული პირი, ვთანამშრომლობთ სოფლის მეურნეობისა და ეკონომიკის სამინისტროსთან და შევიმუშავეთ დევნილთა დახმარების ერთობლივი პროექტები. დევნილთა დასაქმების პრობლემის გადაწყვეტის ეფექტური საშუალებაა "სოფლად სახლის" პროგრანა, რომელიც გულისხმობს 20.000 ლარის ფარგლებში სოფელში სახლის ყიდვას იმ დევნილისთვის, რომელიც მზად არის ქალაქიდან სოფელში წავიდეს. პროგრამის ეფექტურობა მის სისწრაფეშია – ინფრასტრუქტურა მოგვარებულია, სახლს აქვს მიწა, რომლის დამუშავებაც შეუძლია, ადამიანს შემოსავალიც უჩნდება და თანამდევი სტრესიდანაც გამოდის", - აღნიშნავს სოზარ სუბარი.