რუსეთში შეერთებული შტატების ახალი ელჩის თქმით, იმისთვის რომ ამერიკამ და ევროკავშირმა ოფიციალურ მოსკოვს სანქციები მოუხსნან, საჭიროა მინსკში მიღწეული შეთანხმების შესრულება.

„კომერსანტისთვის“ მიცემულ ინტერვიუში ჯონ ტეფტმა აღნიშნა, რომ შეერთებული შტატები არ არის მზად მისცეს რუსეთს გარანტია იმის შესახებ, რომ უკრაინა არ გაწევრიანდება ნატოში.

„ჩვენი აზრით, ყველა ქვეყანამ თავად უნდა გააკეთოს არჩევანი რომელი ორგანიზაციის წევრი გახდება და ამას ვეტოს ვერავინ დაადებს. ვაშნგტონის, ბერლინის, ლონდონის და პარიზის პოზიცია ასეთია: პრეზიდენტმა პოროშენკომ დაპირებების უმრავლესობა შეასრულა, რუსეთის მხრიდან კი ჯერ კიდევ ბევრი რამაა გასაკეთებელი“, – განაცხადა ჯონ ტეფტმა.