თბილისის საკრებულოში 2015 წლის ბიუჯეტის პროექტზე იმსჯელეს

პოლიტიკა - 17:51, 22 Nov, 2014

1410

თბილისის მუნიციპალიტეტის საკრებულოში ხუთი კომისიისა და მერიის საქალაქო სამსახურების უფროსებისა შეხვედრა გაიმართა. შეხვედრა სამი საათის განმავლობაში მიმდინარეობდა, სადაც დეპუტატები და მერიის წარმომადგენლები 2015 წლის ბიუჯეტის პროექტზე მსჯელობდნენ.

სხდომა ჩვეულებისამებრ, კითხვა–პასუხის რეჟიმში წარიმართა. კომისიის თავმჯდომარეებმა და დედპუტატებმა ისეთ პრიორიტეტულ საკითხებზე გაამახვილეს ყურადღება, რომლებიც მათი თქმით აუცილებლად უნდა იყოს ასახული დედაქალაქის 2015 წლის მთავარ ფინანსურ დოკუმენტში.

საკრებულოს განათლებისა და კულტურის კომისიის თავმჯდომარის თამარ ტალიაშვილის განცხადებით, დედაქალაქის 2015 წლის ბიუჯეტის პროექტში უკვე ასახულია კომისიის მიერ წამოყენებული 10-ზე მეტი ინიციატივა, თუმცა მისივე თქმით, მასში ასევე აუცილებელია ჩაიდოს სახელოვნებო სწავლების განვითარება, თეატრალური ხელოვნების ხელშეწყობა, ბაგა–ბაღების პედაგოგებისათვის უფასო მგზავრობა, ბაგა–ბაღებში ორ ცვლიან სწავლებაზე გადასვლის საკითხები და სხვადასხვა მიმართულებები.

სხდომაზე, რომელზეც საკრებულოს განათლებისა და კულტურის, სპორტისა და ახალგაზრდულ საქმეთა, ჯანდაცვისა და სოციალურ საკითხთა, სახელდებისა და სიმბოლიკის და აგრეთვე ადამიანის უფლებათა დაცვისა და საზოგადოებასთან ურთიერთობის კომისიები დედაქალაქის 2015 წლის მთავარი ფინანსური დოკუმენტის პროექტზე მსჯელობდნენ, სოციალური სფეროს, ჯანდაცვის, სპორტისა და ახალგაზრდობის საქმეთა და სხვა მნიშვნელოვანი საკითხებიც განიხილეს. სხდომას აგრეთვე თბილისის მუნიციპალიტეტის საკრებულოს სხვა დეპუტატებიც ესწრებოდნენ.

2015 წლის ბიუჯეტის პროექტის შესწორებული ვარიანტი თბილისის მუნიციპალიტეტის მერიას უახლოეს დღეებში გადაეგზავნება დასამტკიცებლად.