ჰააგაში ნატო-ს საპარლამენტო ასამბლეის მესამოცე სცხდომა გაიხსნა. ოთხ დღიანი შეხვედრის მთავარი თემები უკრაინის კრიზისი, ავღანეთის უსაფრთხოება და ახლო აღმოსავლეთში არსებული ვითარებაა.

მთავარი პლენალური სესია ორშაბათს არის ჩანიშნული, რომელზეც ასამბლეის ახალ პრეზიდენტს აირჩევენ. ასევე ცნობილია, რომ საბოლოო რეზოლუციაში საქართველოც იქნება ნახსენები.

„მქონდა საშუალება მესაუბრა იმ ძალიან დიდ პრობლემაზე, რომელიც არის როგორც უკრაინისთვის, ისე საქართველოსთვის რუსეთის მხრიდან მიმიდნარე ოკუპაცია. საქართველოს სერიოზული პრობლემები აქვს შერჩევითი სამართლისა და პოლიტიკური დევნის გამო, რაც ხელისშემშლელი იქნება ნატო-ში და ევროკავშირში გაწევრიანების გზაზე და მნიშვნელოვანია ჩვენი პარტნიორების სერიოზული მხარდაჭერა“, - განაცხადა გიორგი ბარამიძემ.

ნატო-ს საპარლამენტო ასამბლეაში აშშ–ის დელეგაციის ხელმძღვანელი, მაიკლ ტურნერი ამბობს, რომ "შეერთებული შტატები სრულად უჭერს მხარს საქართველოს. ვფიქრობ, ძალიან მნიშვნელოვანია არა მარტო ჩვენი ორმხრივი ურთიერთობა, არამედ ის თანამშრომლობაც, რომელიც ნატო-ს მეშვეობით გვაქვს. ჩვენ ველოდებით კიდევ უფრო მეტ აგრესიას რუსეთისგან, ამიტომ ძალიან მნიშვნელოვანია, რომ ალიანსი და მისი მოკავშირე ქვეყნები ერთად დადგნენ და მხარი დაუჭირონ საქართველოს. ჩემი აზრით, ნატოს ბოლო სამიტზე საკმაოდ პოზიტიური განცხადებები გაკეთდა. წარმომადგენელთა პალატამ მიიღო რეზოლუციაც, რომელიც მოუწოდებს, რომ საქართველოს მაპი მიანიჭონ. ვმუშაობთ, რომ თანამშრომლობა კიდევ უფრო გაძლიერდეს".