კვიციანის განაჩენის მიღებისას გათვალისწინებული უნდა ყოფილიყო მისი დამსახურებები- სუბარი

პოლიტიკა - 00:43, 22 Nov, 2014

1733

ემზარ კვიციანის საქმესთან დაკავშირებით სოზარ სუბარმა, რომელიც 2006 წელს სახალხო დამცველის მოვალეობას ასრულებდა, გადაცემა ”რეაქციის” ეთერში ისაუბრა.

”ცხადია კოდორის ხეობაში არ იყო ისეთი კონტროლი როგორიც უნდა იყოს ნორმალურ ვითარებაში, იქ იყო კრიმინალის მომატებული დონე, როდესაც ამდენი იარაღია ბუნებრივია ეს ხდება. იქ იყო საჭირო წესრიგის დამყარება, მაგრამ ეს წესრიგის დამყარება უნდა მომხდარიყო ცივილიზებულად. იქ დაჭერილი ადამიანები გასამართლდნენ ტრეფიკინგის ბრალდებით, როცა ასეთი არაფერი არ მომხდარა. ის ადამიანები ცხოვრობდნენ წლობით იმ ოჯახებში და მუშაობდნენ და იყვნენ ოჯახის წევრებივით.” აღნიშნა სოზარ სუბარმა.

სოზარ სუბარის თქმით, ემზარ კვიციან დაუმორჩილებლობის შესახებ განცხადება არ უნდა გაეკეთებინა, რადგან ხელისუფლების მიმართ დამუქების უფლება არავის აქვს:

”ემზარ კვიციანი როცა ჩავიდა კოდორში გარკვეული ინფორმაციები მიუვიდა სწორიც, არასწორიც, იქ გააკეთა განცხადებები, რომელიც იყო აბსოლუტურად მიუღებელი და არ უნდა გაეკეთებინა, არავის არ აქვს უფლება ცენტრალური ხელისუფლების მიმართ მუქარის”

სოზარ სუბარი უარყოფს საზოგადოების გარკვეული ნაწილლის ბრალდებას, იმის შესახებ რომ ემზარ კვიციანის მიმართ გამოტანილი განაჩენი პოლიტიკური გადაწყვეტილება იყო:

”მე ვერ ვიტყვი ბრალი მიუძღვის თუ არ მიუძღვის, იმიტომ რომ გამოძიება გრძელდება შემდეგი სასამართლო იქნება აპელაცია, მაგრამ მე როგორც ხელისუფლების წარმომადგენელი ვაცხადებ რომ ემზარ კვიციანის მიმართ არანაირი პოლიტიკური გადაწყვეტილება არ ყოფილა. პოლიტიკური გადაწყვეტილება რომ ყოფილიყო მაშინ ვიტყოდი, რომ განაჩენის მიღების დროს გათვალისწინებული უნდა ყოფილიყო მისი დამსახურებები ამ ქვეყნის წინაშე. მთავრობის ჩარევა რომ ყოფილიყო მაშინ სხვაგვარი გადაწყვეტილება იქნებოდა.”- განაცხადა სუბარმა.

სოზარ სუბარის განცხადებით მას იმედი აქვს რომ კვიციანის საქმეზე ბრალდების და დაცვის მხარეების მოლაპარაკება შესაძლებელია, სუბარის აზრით ამავე დროს გათვალისწინებული უნდა იყოს კვიციანის დამსახურებებიც

”მე დარწმუნებული ვარ რომ შესაძლებელია შეთანხმება კვიციანის საქმეზე ბრალდების და დაცვის მხარეს შორის, დარწმუნებული ვარ რომ ამის რესურსი არსებობს. რაც მალე მოხდება ეს შეთანხმება მით უკეთესი იქნება .ჩემი პოზიცია არის რომ უნდა გავითვალისწინოთ მისი დამსახურებებიც ისიც რაც მოხდა 2006 წელს.” - აცხადებს სუბარი.