საპარლამენტო უმრავლესობის ლიდერს დავით საგანელიძეს ჟურნალისტების მიმართ პრეტენზიები აქვს, რის გამოც მედიას ერთკვირიან ბოიკოტს უცხადებს.

ამის შესახებ საგანელიძემ ჟურნალისტებთან საუბრისას განაცხადა.

მისი თქმით, მედია მიმდინარე პროცესებს არარეალურად ავრცელებს.

„რაც მეტი იქნება ჟურნალისტების ჩართულობა, ძალიან კარგია, მაგრამ ამავდროულად ნება მომეცით, სერიოზული პრეტენზიები გამოვთქვა ჟურნალისტების გარკვეული ჯგუფის მიმართ. როდესაც მე გულახდილად გესაუბრებით, თქვენგანაც იგივეს ვითხოვ, წინააღმდეგ შემთხვევაში ერთმანეთის ნდობას დავკარგავთ. მე ვერ გავაკეთებ იმას, რომ ბოიკოტი გამოვუცხადო ჟურნალისტებს და არ ვესაუბრო მათ, თუმცა ჩემი პოზიცია რომ დავაფიქსირო, ერთი კვირის განმავლობაში მომავალ კვირას არც ერთ ჟურნალისტს კომენტარს არ მივცემ. ამით არც ქვეყანა არ დაინგრევა, არც მასმედია. რაღაცით ხომ უნდა გითხრათ, რომ არ დაამგვანოთ თქვენი ჟურნალისტიკა იმას, რომ ქვეყანა წაიყვანოთ უბედურებისკენ", - განაცხადა საგანელიძემ.