პედაგოგთა სკოორდინაციო ცენტრი საგამოძიებო კომისიის შექმნას ითხოვს

პოლიტიკა - 17:03, 21 Nov, 2014

1266

პედაგოგთა საკოორდინაციო ცენტრის მიმართვაში საუბარია 2013 წლიდან დღემდე საქართველოს განათლებისა და მეცნიერების სამინისტროს მიერ ჩატარებული კონკურსებში გამოვლენილ კანონდარღვევებზე. კერძოდ, ეს ეხება საგანმანათლებლო რესურსცენტრების უფროსთა და საჯარო სკოლის დირექტორთა შესარჩევ კონკურსებს. რამდენიმე ათეული დარღვევის გარდა, მიმართვაში ხაზგასმითაა საუბარი საკონკურსო კომისიების არალეგიტიმურობაზე, კერძოდ:

„საქართველოს განათლებისა და მეცნიერების სამინისტროს შიდა აუდიტის დეპარტამენტის დებულების მიხედვით შიდა აუდიტორს უფლება არა აქვს, სამინისტროში შეასრულოს სხვა ფუნქციები, გარდა „სახელმწიფო შიდა ფინანსური კონტროლის შესახებ’’ საქართველოს კანონით, ხსენებული დებულებითა და სხვა სამართლებრივი აქტებით განსაზღვრული ფუნქციებისა“(მუხლი 8,1). ხსენებული ნორმატიული აქტის დარღვევით, როგორც რესურსცენტრების უფროსთა, ისე საჯარო სკოლების დირექტორთა შესარჩევი საკონკურსო კომისიების წევრი გახლდათ სამინისტროს აუდიტორები. ეს დასტურდება კომისიის საოქმო ჩანაწერებზე მათი ხელმოწერით.

ყოველივე ზემოაღნიშნულიდან გამომდინარე, პედაგოგთა საკოორდინაციო ცენტრი მოითხოვს:

1. ბათილად იქნეს ცნობილი 2013 წლიდან დღემდე სამინისტროს მიერ დარღვევებით ჩატარებული კონკურსების შედეგები;

2. შეიქმნას სპეციალური საპარლამენტო საგამოძიებო კომისია 2013 წლიდან დღემდე ჩატარებული კოკურსებში დარღვევების გამოსავლენად.

3. დაეკისროს პასუხისმგებლობა იმ პირებს, ვინც ხელმძღვანელობდა საკონკურსო კომისიებს, კერძოდ 2013 წლისთვის ესენი გახლდნენ ამჟამინდელი პრეზიდენტი და განათლების და მეცნიერების ყოფილი მინისტრი გიორგი მარგველაშვილი, და მისი მაშინდელი მოადგილეები, მათ შორის ამჟამინდელი ვიცე მერი ალუდა გოგლიჩიძე და სხვები. ხოლო 2014 წელს ამჟამინდელი მინისტრი თამარ სანიკიძე.