უმრავლესობის წევრი ვახტანგ ხმალაძე ე.წ. გასაღებთან დაკავშირებით თანაგუნდელების მიერ მომზადებულ კანონპროექტს არალოგიკურს უწოდებს.

ამის შესახებ ხმალაძემ „ნიუპოსტთან“ საუბარში განაცხადა.

მისი თქმით, ბესელიას, სესიაშვილის და ფოფხაძის მიერ მომზადებული პროექტის სუსტი წერტილი არის ის, რომ ე.წ. გასაღები მონაცემთა დაცვის ინსპექტორის ხელში იქნება.

„შინაგან საქმეთა სამინისტროს აქვს სხვა ტიპის გასაღებიც. მაგალითად, როდესაც მე მაქვს საწერი მაგიდა, რომლის უჯრაც მაქვს ჩაკეტილი, მაგიდაც ჩემია, უჯრაც ჩემია და გასაღებიც მე მიდევს ჯიბეში. მეორეა, როდესაც ამ უჯრას აქვს სხვა გასაღები, რომელიც სხვამ თუ არ გააღო, ისე ვერ ჩავიხედავ უჯრაში. ანუ მთავარია, რომ სამინისტროს შეუძლია მიიღოს ინფორმაცია, მაგრამ მანამდე სხვამ უნდა გადაატრიალოს ე.წ. გასაღები. ბესელია, სესიაშვილი, ფოფხაძის კანონპროექტის მიხედვით ეს სხვა პერსონალურ მონაცემთა დაცვის ინსპექტორია. აქ არის მეორე პრობლემა. პრობლემა არის ასეთი, რომ ჩემს შემთხვევაში გასაღები აქვს მარეგულირებელს, იმათ შემთხვევაში - ინსპექტორს. ამ პროცესის დროს შესაძლებელია, რომელიმე სუბიექტმა, გასაღების გადამტრიალებელმა დაარღვიოს კანონი და გასაღები გადაატრიალოს მაშინ, როდესაც ეს არ შეიძლება. ამიტომ საჭიროა ამ მოქმედებების ზედამხედველი. კანონით ასეთ კონტროლს ახორციელებს პერსონაურ მონაცემთა დაცვის ინსპექტორი. ჩემი პროექტის მიხედვით, ინსპექტორი გარეთ დგას და სამივეს მოქმედებაზე ზედამხედველობას ახორციელებს. ბესელიას შემთხვევაში, მთლად ინსპექტორია გასაღების მფლობელი. რა გამოდის, რომ მან თავისივე ქმედებას უნდა გაუწიოს ზედამხედველობა?ეს არალოგიუკურია. ამ პროექტის სუსტი ელემენტი არის ის, რომ გასაღები არის ინსპექტორის ხელში. ამ შემთხვევაში მე არჩევანი გავაკეთე მარეგულირებელ კომისიაზე, რადგან ამ პროექტის განხორციელება უფრო მარტივი იყოს. იმიტომ, რომ ახალი უწყების შექმნა არ გახდეს და ასე შემდეგ. სწორედ ეს არის არსებითი განსხავება ამ ორ პროექტს შორის“, - განაცხადა ხმალაძემ „ნიუპოსტთან“ საუბარში.

ირაკლი სესიაშვილის, ეკა ბესელიას და გედევან ფოფხაძის მიერ მომზადებული კანონპროექტის მიხედვით ე.წ. გასაღები ერთის მხრივ უნდა იყოს შინაგან საქმეთა სამინისტროს ხელში, ხოლო მეორე „გასაღები“ პერსონალური დაცვის ინსპექტორის ხელში.

არსებობს არასამთავროვო სექტორის მიერ მომზადებული კანონპროექტი, რომლის მიხედვითაც ფარული მოსმენებისას უნდა იყოს ორგასაღებიანი სისტემა, რომლის ფარგლებშიც ერთი გასაღები ექნება სასამართლოს, ხოლო მეორე მობილურ პროვაიდერ კომპანიებს.