,,იმედი გვაქვს, ევროსაბჭოს ოფისთან შეხვედრა ხელისუფლების პოლიტიკური ნების ჩამოყალიბებას ხელს შეუწყობს"

პოლიტიკა - 21:40, 20 Nov, 2014

824

21 ნოემბერს 12:00 საათზე არასაპარლამენტო პოლიტიკურ პარტიათა ლიდერები ("ახალი მემარჯვენეების", "გაერთიანებული დემოკრატიული მოძრაობის", "ედპ", "ქართული დასის", "პარტია თავისუფლების", "პატრიოტთა ალიანსის", "სამოქალაქო ალიანსი თავისუფლებისთვის" ) ევროსაბჭოს ოფისის ხელმძღვანელს კატერინა ბოლონიეზეს შეხვდებიან. რა საკითხებზე გაამახვილებენ ყურადღებას პარტიათა ლიდერები, ამის შესახებ ,,ნიუპოსტი" ედპ-ს ლიდერს ბაჩუკი ქარდავას ესაუბრა:

„ქვეყანაში საარჩევნო სისტემა და საარჩევნო გარემო არ არის კონკურენტული. ოპოზიციური პარტიების ფართო სპექტრმა დავიწყეთ პროცესი, რომლის შედეგად, ხელისუფლების წინაშე წარვადგენთ ერთიან პოზიციას თუ როგორ მიგვაჩნია რეალურად რეფორმის გატარება საარჩევნო კანონმდებლობაში. არის საკითხები, რომელიც ინტერპარტიულ ფორმატში უკვე გავიარეთ და კონსენსუსი მიღწეულია. თუმცა მთავარია, კონსენსუსი ხელისუფლებასთან შედგეს, გამომდინარე იქიდან, რომ საბოლოო ჯამში, მის პოლიტიკურ ნებაზე იქნება დამოკიდებული რეალური რეფორმების გატარება. ვფიქრობ, ამ საქმეში საერთშორისო თანამეგობრობის აქტიურობა მნიშნელოვანი ბერკეტია. ვინაიდან, სწორედ საარჩევნო კანონმდებლობასთან დაკავშირებით არაერთი რეზოლუცია აქვს მიღებული ევროსაბჭოს, ლოგიკურა, რომ შეხვედრა საერთორისო ორგანიზაციებთან ევროსაბჭოს ოფისიდან დავიწყოთ. იმედი გვაქვს, რომ ეს შეხვედრები ხელისუფლების პოლიტიკური ნების ჩამოყალიბებას ხელს შეუწყობს“, - განაცხადა ბაჩუკი ქარდავამ.