მომღერალი და ფოლკლორის სახელმწიფო ცენტრის პიარმენეჯერი დავით გოგოლაშვილი სოციალურ ქსელში პოლიციელებისადმი შეთავაზებას აკეთებს და მათ მუსიკალური ინსტრუმენტების შესახებ მასტერკლასის ჩატარებას სთავაზობს. ამ შეთავაზების მიზეზი კი გახდა შემთხვევა, რომელიც 19 ნოემბერს მოხდა და რომლის მონაწილეც გოგოლაშვილის თანამშრომელი- ერთერთი მუსიკოსი გახდა.

„გუშინ, შსს თანამშრომლებმა, ბოცვაძის (ვერა) ქუჩაზე გააჩერეს საქართველოს ფოლკლორის სახელმწიფო ცენტრის თანამშრომელი, ცნობილი ფოლკლორული ანსამბლის წევრი გაჩხრიკეს და აღმოუჩინეს კამერტონი,მიუხედავად განმარტებისა, მათ კამერტონი საშიშ ნივთად მიიჩნიეს და ჩამოართვეს.

უხერხულია მდიდარი ფოლკლორული და სასიმღერო ტრადიციების მქონე ქვეყანაში, ამოწმებდე მუსიკოსს და ართმევდე პროფესიულ ინსტრუმენტს.

დაკითხვა-გაჩხრეკის შემდეგ დააპირეს აქტის შედგენა, შედეგად ჩვენმა კოლეგამ დაუტოვა "საშიში" კამერტონი პოლიციელებს და დაემშვიდობა.

მზად ვართ დრო დავუთმოთ ე.წ. ოპერებს და ზოგადი ინფორმაცია მივაწოდოთ მუსიკალური ინსტრუმენტების შესახებ, ჩავუტაროთ მასტერკლასი. უღრმესი პატივისცემით - მე“- წერს დავით გოგოლაშვილი სოციალურ ქსელში.

კამერტონი- ორთითა ჩანგლის მსგავსი ფოლადის ხელსაწყო, რომელიც რამეზე დაკვრისას გამოსცემს გარკვეული სიმაღლის ტონს; იხმარება მუსიკალური საკრავის აწყობის დროს, მომღერალთა გუნდისათვის ტონის მისაცემად და ა.შ.