დევნილთა სამინისტრო ქართველი მენაშენეებისგან დევნილებისთვის ბინებს შეიძენს. ამის შესახებ მინისტრმა სოზარ სუბარმა განაცხადა.

„ქართველი მენაშენეებისთვის გამოცხადდება კონკურსი. პირველ ეტაპზე მშენებარე სახლებს შევიძენთ, მეორე ეტაპზე ავამუშავებთ პროგრამას, რომელიც წლების წინ გაჩერებული კორპუსების განახლებას შეეხება. მენაშენეთა შესახებ კონკურსი უახლოეს დღეებში გამოცხადდება. პროექტი შეეხება მხოლოდ თბილისს. თბილისში მყოფ მენაშენეებს უფლება ექნებათ ამ კონკურსში მონაწილეობა მიიღონ“, - განაცხადა სუბარმა.

მინისტრმა სოფლის სახლის პროექტზე და ახალი სოფლების მშენებლობაზეც ისაუბრა და აღნიშნა, რომ ეს პროექტი მომავალი წლიდან დაიწყება.

„მას შემდეგ რაც ბოლო ერთ თვეში პროექტი გააქტიურდა, სოფელში სახლის შეძენის სურვილი 350-ამდე ადამიანმა გამოთქვა. 350-იდან უმეტესობის ყიდვა მოესწრება წლის ბოლომდე ან იანვარ-თებერვალში“ - განაცხადა სუბარმა.