ფარულ მოსმენებზე შინაგან საქმეთა სამინისტროს წვდომის უფლება ყველა შემთხვევაში ექნება, იმის მიუხედავად იქნება თუ არა ე.წ. გასაღები მის ხელში, - ამის შესახებ ექსპერტი ლევან ალაფიშვილი ,,ნიუპოსტთან" საუბრობს.

ექსპერტი აღნიშნავს, რომ საკანონმდებლო დონეზე გაწერილი ნორმა ხელისუფლებას კვლავ აძლევს ფარული მოსმენების სუბიექტურად და მინიმალური კონტროლით გამოყენების ლეგიტიმურ საშაულებას.

ალაფიშვილის განმარტებით, იმის გამო, რომ შინაგან საქმეთა სამინისტროს რეორგანიზაცია არ მოხდა, მის ხელში რჩება როგორც სისხლის სამართლებრივი პროცედურები, ასევე ოპერატიულ–სამძებრო და სპეცსამსახურების ფუნქციები. ამდენად, ლოგიკურია მას კვლავ ექნება „მოსმენებზე“ წვდომის უფლება.

„რეალურად ეს დისკუსია როგორც არ უნდა მოგვარდეს, ფარული მოსმენების ცუდათ სუბიექტურად თუ არა კეთილსინდისიერად გამოყენების ლეგიტიმური საშაულება კვლავ ხელისუფლების ხელში რჩება. ავიღოთ კონტრდაზვერვითი საქმიანობისა თუ საზოგადოებრივი უსაფრთხოების სამსახურის შესახებ კანონები, სადაც წერია, რომ ფარული მიყურადება და მსგავსი საქმიანობები, არა თუ სასამართლოს კონტროლს არ ექვემდებარება, არამედ არ ექვემდებარება არც პროკურატურის ეფექტურ ზედამხედველობას. უკეთეს შემთხვევაში მხოლოდ საპროკურორო ზედამხედველობას, ექვემდებარება უსაფრთხოების სამსახურის მხოლოდ საგამოძიებო საქმიანობის ნაწილი. გაახსენდა რომელიმე კანონმდებელს, რომ ეს ნორმები არსებობს ჩვენს კანონებში?. ვის ხელშიც არ უნდა იყოს ე.წ. გასაღები, საკანონმდებლო დონეზე უკანონო მოსმენების საფრთხე კვლავ რჩება. ეხლა მსჯელობა მიდის ე.წ. გასაღებზე ანუ სისხლის სამართლებრივი პროცედურების ფარგლებში სანქცირება და აღსრულება როგორ მოხდება და ვის ხელში იქნება გასაღები. თუმცა სპეცსამსახურების და ოპერატიული–სამძებრო საქმიანობის საქმებში საზოგადოებრივი უსაფრთხოების სამსახურისა თუ კონდაზვერვითი საქმიანობის კანონები ამ ყველაფრის ეფექტური კონტროლის გარეშე განხორციელების საშუალებას ითვალისწინებს. კომპლექსურად უნდა განვიხილოთეს ყველაფერი. ჩვენთან კანონმდებლობა წინააღმდეგობრივია და ძალოვან უწყებებს აძლევს ფარული მოსმენების სუბიექტურად თუ ბოროტად გამოყენების საშუალებას, ისევე როგორც სისტემურად არ არის დაცული შეცდომისაგან. თუ გავითვალისწინებთ იმასაც, რომ ხელისუფლება არ მიდის შინაგან საქმეთა სამინისტროს რეორგანიზაციაზე ანუ შსს-ს ხელში რჩება როგორც სისხლის სამართლებრივი პროცედურები, ასევე ოპერატიულ–სამძებრო საქმინობა და სპეცსამსახურების ფუნქციები. თუ ე.წ. გასაღები შეეხება მხოლოდ სისხლის სამართლებრივ პროცედურებს გამოდის, რომ დღეს არარეორგანიზებულ შსს-სსიტემაში, იარსებებს ერთი მიმართულება, რომელიც სასამართლოთი და აღსრულებით კონტროლირებადია და მეორე სპეცსამსახურების მიმართულება, რომელიც საერთოდ არ არის კონტროლირებადი“, - ამბობს ალაფიშვილი ,,ნიუპოსტთან".

ფარულ მოსმებენზე ე.წ. გასაღების საკითხზე პარლამენტში რამდენიმე დღეა მსჯელობა მიმდინარეობს. ე.წ. გასაღებზე კანონპროექტის სამი ვარიანტია მომზადებული. ერთი ვარიანტი ეკა ბესელიას, ირაკლი სესიაშვილს და გედევან ფოფხაძეს ეკუთვნით, მეორე - ვახტანგ ხმალაძეს, მესამე კი - არასამთავრობო სექტორს.

ნინო დათაშვილი