საქართველოს თავდაცვის ყოფილი მინისტრი, ირაკლი ალასანია დღეს დილით ამერიკის შეერთებულ შტატებში სამუშაო ვიზიტით გაემგზავრა. აეროპორტში „თავისუფალი დემოკრატების“ ლიდერმა კიდევ ერთხელ გააკეთა აქცენტი პოლიტიკურ დევნაზე. ვაშინგტონსა და ნიუ იორკში დაგეგმილია შეხვედრები სახელმწიფო დეპარტამენტის წარმომადგენლებსა და სხვა მაღალჩინოსნებთან, სადაც განხილვის მთავარი თემა ბოლო პერიოდში შექმნილი ვითარება იქნება.

შეერთებულ შტატებში ჩასვლამდე ირაკლი ალასანია შეხვედრებს კანადაში გამართავს. ის უსაფრთხოების საკითხებთან დაკავშირებით საერთაშორისო ფორუმზეა მიწვეული.

„ის ქმედებები, რასაც პროკურატურა ჩვენი მისამართით აკეთებს, ამას პოლიტიკური სარჩული აქვს. ახლა ერთ საქმეს, ორ საქმეს, ათ საქმეს თუ შეკერავენ, ეს მათი საქმეა. მე დარწმუნებული ვარ მათ აბსოლუტურ უდანაშაულობაში, რაც სწრაფად მოხდება ღიად გამოძიების ჩატარება, მით უფრო მალე დაინახავს საზოგადოება ყველაფერს და პირდაპირ გეტყვით, მოუწევთ პასუხისგება პროკურატურის იმ თანამშრომლებს, ვინც ასეთი რამ ჩაიდინა“, - განაცხადა ირაკლი ალასანიამ.