ამერიკის შეერთებული შტატების ელჩმა საქართველოში, რიჩარდ ნორლანდმა ბრიუსელში საქართველოს სამთავრობო დელეგაციის ვიზიტი შეაფასა. დიპლომატის განცხადებით, პრემიერმინისტრმა ირაკლი ღარიბაშვილმა წარმატებული შეხვედრები გამართა ევროკავშირსა და ნატო-ში:

"გუშინ ყველა ვაკვირდებოდით, თუ რაოდენ წარმატებული შეხვედრები გამართა საქართველოს სამთავრობო დელეგაციამ ევროკავშირსა და ნატო-ში. ამავე დროს გამოითქვა წუხილი სამართლებრივი სისტემის იმგვარად გამოყენებასთან დაკავშირებით, რომ არ მოხდეს აღქმა საქმეების პოლიტიკური მოტივაციის საფუძველზე წარმართვის შესახებ. ამერიკის შეერთებული შტატები უერთდება ამ წუხილს და გამოვთქვამთ იმედს, რომ ყველაფერი იქნება წარმართული ისე, რომ არ იქნება დარჩენილი არანაირი ეჭვი საქმის პოლიტიკურად მოტივირებულობასთან დაკავშირებით“, - განაცხადა რიჩარდ ნორლანდმა.

ნორლანდმა თავდაცვის სამინისტროში მიმდინარე მოვლენებზეც გააკეთა კომენტარი და ე.წ. კაბელების საქმეზე გრიფი საიდუმლოს მოხსნის თემას შეეხო:

„რა მასალა უნდა გასაჯაროვდეს, ამასთან დაკავშირებით ჩემგან არ იქნება მიზანშეწონილი კომენტარის გაკეთება. ზოგადად შემიძლია აღვნიშნო, რომ ნებისმიერ საზოგადოებაში, როცა ადამიანს ბრალს უყენებენ, მისი წარმომადგენლის სახით დაცვის მხარეს უნდა მიეცეს საშუალება, გაეცნოს მასალებს. ამის შედეგად აწყობს ის, როგორ უნდა განახორციელოს დაცვა", - განაცხადა რიჩარდ ნორლანდმა.