კახა ოქრიაშვილს, რომელიც ფრაქცია „უპარტიო, დამოუკიდებელი მაჟორიტარების“ თავმჯდომარეა, პარლამენტის ნდობის ჯგუფის დატოვება მოუწევს. ცნობილია, რომ ნდობის ჯგუფის შემადგენლობაში ხუთი წევრია, საიდანაც ერთი თავდაცვის კომიტეტის თავმჯდომარეა, დანარჩენები კი - უმრავლესობის, უმცირესობის, მაჟორიტარი დეპუტატების, უმრავლესობისა და უმცირესობის გარეთ მყოფი პარლამენტის წევრების წარმომადგენლები.

ნდობის ჯგუფში გამოთავისუფლებულ კვოტაზე პრეტენზია შეუძლია ამ დროისთვის არსებულმა 13-მა დამოუკიდებელმა დეპუტატმა განაცხადოს, რომელთა შორისაც "თავისუფალი დემოკრატებიც" არიან.

აღნიშნულის შესახებ ჟურნალისტებთან საუბრისას კომენტარი ზვიად ძიძიგურმა გააკეთა:

"ვინაიდან კახა ოქრიაშვილი აღარ ითვლება უმრავლესობის და უმცირესობის გარეთ მყოფი ფრაქციის წარმომადგენლად, ბუნებრივია, ამ ადგილზე იმ დეპუტატებს შეუძლიათ ნდობის ჯგუფში თავიანთი წარმომადგენლის წარმოდგენა, რომლებიც პარლამენტის დამოუკიდებელ წევრებად ითვლებიან. ასეთი სულ 13 დეპუტატია", - განუცხადა ჟურნალისტებს ვიცე-სპიკერმა ზვიად ძიძიგურმა.