საქართველოს პრემიერმინისტრი ირაკლი ღარიბაშვილი ბრიუსელში ორდღიან ვიზიტს აფასებს. ღარიბაშვილმა აღნიშნა, რომ სხვადასხვა შეხვედრებისას ქვეყნისთვის აქტუალურ თემებზე ისაუბრა:

„კომიტეტმა გუშინ რეზოლუცია მიიღო საქართველოსთან დაკავშირებით, დეკემბრის ბოლოს დაგეგმილია ასოცირების ხელშეკრულების რატიფიცირება და მიმაჩნია, რომ ეს არის ძალიან მნიშვნელოვანი, ვინაიდან ეს გადასცემს ახალ იმპულსს სხვა ქვეყნებს, რათა მათაც დროულად მოახდინონ ასოცირების ხელშეკრულების რატიფიცირება. ჩვენთვის მნიშვნელოვანია, რომ ევროპარლამენტი წლის ბოლოს ჩვენი ხელშეკრულების რატიფიცირებას მოახდენს. მთავარი არის, რომ ქვეყანაში, ჩვენთან იყოს ერთსულოვნება, სტაბილურობა, ჩვენ ამას აუცილებლად მივაღწევთ, აუცილებელია, რომ ოპოზიცია კიდევ უფრო კონსტრუქციული გახდეს, მე ამის იმედი მაქვს და ჩვენ ამისთვის მოტივირებული ვართ. შერჩევით სამართალთან დაკავშირებით გაჩნდა კითხვა, არა თუ კითხვა, მათ აქვთ სრული ინფორმაცია, მათ იციან, მე კიდევ ერთხელ განვუმარტე, რომ ჩვენ ვართ მაქსიმალურად მოტივირებულნი, პროკურატურა არავითარ საქმეში არ ერევა, სასამართლო არის სრულიად თავისუფალი“, - განაცხადა ირაკლი ღარიბაშვილმა.