„დემოკრატიული მოძრაობის“ ლიდერი ნინო ბურჯანაძე პრემიერ-მინისტრს მიხეილ სააკაშვილის პოლიტიკის „გათეთრებაში“ ადანაშაულებს.

ამის შესახებ ბურჯანაძემ ჟურნალისტებთან საუბრისას განაცხადა.

მისი თქმით, პრემიერის განცხადება, რომ უკრაინაში განვითარებული მოვლენები 2008 წლის მოვლენების გაგრძელებაა, რუსეთთან დიალოგზე უარის თქმას ნიშნავს.

„ღარიბაშვილის განცხადება იმასთან დაკავშირებით, რომ უკრაინაში მიმდინარე მოვლენები 2008 წლის ომის გაგრძელებაა, არის პირდაპირი გამეორება იმისა, რასაც სააკაშვილი ამბობს. ეს არის სააკაშვილის პოლიტიკის და ქმედებების გათეთრება. ასევე, ამ განცხადების გაკეთება პირდაპირ ნიშნავს რუსეთთან დიალოგზე უარის თქმას. ამ განცხადებით ღარიბაშვილმა დიდი ხნით დახურა რუსეთის ხელისუფლებასთან მოლაპარაკების შესაძლებლობა“, - განაცხადა ბურჯანაძემ.

„დემოკრატიული მოძრაობის“ ლიდერმა, ასევე მოუწოდა ხელისუფლებას ნათლად გააკეთოს გამიჯვნა ევროკავშირსა და ნატოს წევრობას შორის.

„ერთხელ და სამუდამოდ საქართველოს ხელისუფლებამ უნდა ისწავლოს, რომ საქართველოს უმთავრესი მიზანი უნდა იყოს, არა რომელიმე საერთაშორისო ორგანიზაციაში გაწევრიანება, არამედ საქართველოს ტერიტირიული მთლიანობა. ამისათვის აუცილებელია, რომ ხელისუფლებამ ნათლად გააკეთოს გამიჯვნა ევროკავშირსა და ნატოს წევრობას შორის, საქართველოს ბევრ სხვა პრობლემებს შორის, რადგან ძალიან კარგად ვიცით, რომ ევროკავშირში გაერთიანება ნატოს წევრობას არ ნიშნავს“, - განაცხადა ბურჯანაძემ.