საქართველოს პრემიერ მინისტრმა NATO-ს გენერალურ მდივან იენს სტოლტენბერგთან რუსეთის მიერ საქართველოს ოკუპირებული ტერიტორიებისთვის შეთავაზებული ხელშეკრულებები განიხილა. ამის შესახებ შეხვედრის დასრულების შემდეგ გამართულ ერთობლივ პრესკონფერენციაზე თავად საქართველოს მთავრობის თავმჯდომარემ განაცხადა.

"ჩვენ განვიხილეთ რეგიონული უსაფრთხოების ღონისძიებები, განსაკუთრებით, რუსეთის ფედერაციის ბოლო წინადადება, საქართველოს ოკუპირებულ ტერიტორიასთან, აფხაზეთთან, ხელი მოაწეროს ე.წ. ხელშეკრულებას ალიანსისა და ინტეგრაციის შესახებ. ამ კუთხით, მინდა გამოვხატო ჩვენი შეშფოთება და წუხილი იმის გამო, რომ მიუხედავად რუსეთისადმი ჩვენი კონსტრუქციული მიდგომისა, რუსეთის მხარე ოკუპირებულ რეგიონებში აგრძელებს დესტრუქციულ პოლიტიკას საქართველოს წინააღმდეგ, რითაც მიზნად ისახავს აფხაზეთის რეგიონის და, შესაძლოა, ცხინვალის რეგიონის, დე-ფაქტო ანექსიას", - განაცხადა ირაკლი ღარიბაშვილმა ბრიუსელში, ნატოს გენერალურ მდივანთან გამართულ ერთობლივ პრესკონფერენციაზე.

ირაკლი ღარიბაშვილის თქმით, ის რაც ახლა უკრაინაში ხდება, საქართველოს 2008 წლის ომის გაგრძელებაა,

"კიდევ ერთხელ შეგახსენებთ ყველას, რომ ჩვენ მსგავსი კონფლიქტი 2008 წელს გამოვიარეთ და, ვფიქრობ, ის რაც ახლა უკრაინაში ხდება, ჩვენი 2008 წლის ომის გაგრძელებაა. მაგრამ, ჩვენ განვაგრძობთ წინსვლას, ვდგავართ სწორ გზაზე და მასზე სვლას გავაგრძელებთ,” - თქვა პრემიერმა.

„მინდა ხაზი გავუსვა ჩვენს დიდ მადლიერებას ალიანსის მდგრადი და მუდმივი მხარდაჭერის გამო, საქართველოს, საერთაშორისოდ აღიარებული საზღვრების ფარგლებში, სუვერენიტეტისა და ტერიტორიული მთლიანობის მიმართ. ჩვენ დარწმუნებულნი ვართ, რომ საქართველოს ოკუპირებული ტერიტორიების საკითხი დარჩება ალიანსის საგანგებო საკითხთა შორის ჩვენ კვლავ გავაგრძელებთ თანამშრომლობას საერთაშორისო საზოგადოებასთან, ნატოს გენერალურ მდივანთან“ - აღნიშნა ირაკლი ღარიბაშვილმა