სპორტისა და ახალგაზრდობის საქმეთა სამინისტრო აუდიტის სამსახურის დასკვნის ოფიციალურ ანგარიშს ელოდება. ამის შესახებ სამინისტროს საზოგადოებასთან ურთიერთობის სამსახურის უფროსმა ეკა კვიტაშვილმა განაცხადა.

"სამინისტრო აუდიტის სამსახურის ოფიციალურ ანგარიშს ელოდება. ეს ოფიციალური ანგარიში ჯერჯერობით წარმოდგენილი არ გვაქვს. ამის შემდეგ ჩვენი მხრიდან შეფასებული იქნება ანგარიშში აღნიშნული გარემოებები და აუცილებლად მოხდება აუდიტის სამსახურთან შეპასუხება. ამის შემდეგ მოხდება განცხადების გავრცელება ჩვენი მხრიდან“, - აცხადებს ეკა კვიტაშვილი.

აუდიტის სამსახურის ინფორმაციით, საქართველოს ბიუჯეტმა 132 მილიონი ლარით იზარალა. უწყების ინფორმაციით, აღნიშნული დარღვევები, როგორც წინა, ასევე მოქმედი ხელისუფლების პირობებში გამოვლინდა.

აუდიტის სამსახურის ხელმძღვანელს ლაშა თორდიას ექსკლუზიურად გამოცემა „კვირის პალიტრა“ ესაუბრა. სტატიის თანახმად, ყველაზე დიდი დარღვევები თავდაცვის, ჯანდაცვის და შინაგან საქმეთა სამინისტროებში იკვეთება.