"სრულიად საქართველოს სახალხო დარბაზმა" რუსთაველის მეტროს მიმდებარე ტერიტორიიდან სადაც ენმ-ს საწინააღმდეგო მიტინგს მართავდა, ოფისში გადაინაცვლა.

როგორც ორგანიზაციის ერთ-ერთმა ლიდერმა გოდერძი ოთარაშვილმა განაცხადა, თუ ნაციონალური მოძრაობა "რუსთაველზე კარვებს გაშლის და აქციებს გააგრძელებს, ისინი ოფისს დატოვებენ და პარტიას დესტრუქციული ქმედებების უფლებას არ მისცემს".

სახალხო დარბაზის თქმით ისინი რჩებიან ოფისში, თუმცა მათი წარმომადგენლები მთელი საქართველოს მასშტაბით არიან მობილიზებულები და თუ შეატყობენ, რომ ერთიანი ნაციონალური მოძრაობა გეგმავს პროვოკაციებს, ისინი „ნაციონალებს გადაუვლიან" და სახელმწიფო გადატრიალების მოწყობის შესაძლებლობას არ მისცემენ.

"დავაფიქსირეთ ჩვენი პოზიცია, რომ მთელმა მსოფლიომ უნდა გაიგოს, რომ საქართველოსმოსახლეობის უმეტესობა არ აღიარებს ნაციონალურ მოძრაობას. დავაფიქსირეთ ჩვენი აზრი და ყურადღებით ველოდებით მოვლენების განვითარებას, არ ვიშლებით. ყველა წერტილში ჩვენი ხალხია გაშვებული და მოვლენებს ვაკვირდებით" - ამბობს გოდერძი ოთარაშვილი.

„სრულიად საქართველოს სახალხო დარბაზის“ წევრები და მხარდამჭერები, „ნაციონალური მოძრაობის“ საწინააღმდეგო კონტრაქციის ფარგლებში, რუსთაველის მეტროსთან შეიკრიბნენ, თუმცა პოლიციამ საშუალება არ მისცა, რომ გზა რუსთაველის გამზირისკენ გაეგრძელებინათ.