საქართველოს პრეზიდენტმა გიორგი მარგველაშვილმა საზოგადოებრივი მაუწყებლის ეთერში ირაკლი ალასანიასთან შეხვედრის შესახებ ისაუბრა და განაცხადას, რომ ის შეხვდა არა თავდაცვის ყოფილ მინისტრს, არამედ პარტიის ლიდერს.

"არ მგონია, რომ თავდაცვის ყოფილ მინისტრს შევხვდი, რა თქმა უნდა, ალასანია არის ყოფილი მინისტრი, მაგრამ შევხვდი პარტიის ლიდერს. ის დეტალები, თუ როგორ მიდის გამოძიება, ამაზე არც მინდოდა, რომ გვესაუბრა და არც მისაუბრია. იმიტომ, რომ ეს არ არის ჩემთან განხილვის თემა და საკითხი. ალასანიამ თქვა, რომ მიმდინარეობს გამოძიება, მერე მესაუბრა თავისი პარტიის მშენებლობის საკითხზე. იმ თემაზე, რაც ნამდვილად მაინტერესებს. როგორ მიმდინარეობს გამოძიება, რა დეტალებია, ეს თემები არ არის ჩემთან განსახილველი, არა იმიტომ, რომ არ ვგულშემატკივრობ ვინმეს, ჩემთვის საინტერესოა რამდენად ძლიერ, ეფექტურ პარტიად ჩამოყალიბდებიან "თავისუფალი დემოკრატები", - აღნიშნა პრეზიდენტმა.

გიორგი მარგველაშვილმა "თავისუფალი დემოკრატების" კოალიციიდან გასვლასთან დაკავშირებითაც ისაუბრა. მარგველაშვილის თქმით "თავისუფალი დემოკრატები" კოალიციის "მნიშვნელოვანი და ძლიერი შემადგენელი ძალა იყო".

"არ მინდა კომენტარი გავაკეთო კოალიციასთან დაკავშირებით. მაგრამ პოზიტიურ კომენტარს გავაკეთებ. მიმაჩნია, რომ "თავისუფალი დემოკრატები" კოალიცია "ქართული ოცნების" მნიშვნელოვანი და ძლიერი შემადგენელი ძალა იყო. ესენი იყვნენ ადამიანები, ვისთან ერთადაც ვიბრძოდით, რომ შეცვლილიყო სააკაშვილის რეჟიმი. რამდენად ეს კარგია ქართული დემოკრატიისთვის, რამდენად ჩამოყალიბდებიან ძლიერ ძალად, ეს ჩემთვის უცნობია, მაგრამ მე მათ წარმატებას ვუსურვებ", - განაცხადა მარგველაშვილმა.