პოლონეთში გახსნილი ქართული რესტორნის სარეკლამო ფლაერებზე ქვეყნის რუკა დამახინჯეს. საგარეო საქმეთა სამინისტროს ინფორმაციით, რესტორნის, სახელწოდებით "ბათუმი" მეპატრონე პოლონეთის მოქალაქეა.

"პოლონეთში საქართველოს საელჩო დაუკავშირდა რესტორნის მეპატრონეს და მას განემარტა, რომ ზემოთ ხსენებული რუკის გავრცელება ასეთი ფორმით არის ყოვლად მიუღებელი და დაუშვებელი და მოითხოვეს მისი ამოღება. მეპატრონემ განაცხადა, რომ აუცილებლად გაითვალისწინებს საქართველოს საელჩოს მოთხოვნას, დისტრიბუციიდან ზემოთხსენებული რუკების ამოღება მოხდება და დაიბეჭდება ახალი შესწორებული ვერსია",-განაცხადა საგარეო საქმეთა სამინისტროს საზოგადოებასთან ურთიერთობის დეპარტამენტის უფროსმა მარი ნარჩემაშვილმა საზოგადოებრივ მაუწყებელთან საუბარში.

საქართველოს რუკების დამახინჯებული სახით დაბეჭდვის გამო, მას უკვე დაუკავშირდა პოლონეთში საქართველოს საელჩო და ქართული სათვისტომოც. როგორც მეპატრონე აღნიშნავს, ფლაერები სარეკლამო კომპანიას დაუკვეთა და საზღვრების სიზუსტე თავად არ გაუკონტროლებია.