იურისტი და ყოფილი პარლამენტარი ვალერი გელბახიანის აზრით, თავდაცვის უწყებასთან დაკავშირებული ე.წ კაბელების საქმე პროკურატურას უკვე წაგებული აქვს, მიზეზად კი პროკურატურის არასათანადო მომზადებას ასახელებს და აცხადებს, რომ არ მოხდა წინასწარი გათვლა იმის თუ რა რეზონანსი შეიძლებოდა მოჰყოლოდა ალასანიას წონის პოლიტიკურ ფიგურასთან დაპირისპირებას:

„ე.წ კაბელების საქმემ ისეთი რეზონანსი მიიღო, ხელისუფლება თავის მართლების რეჟიმში გადავიდა, რაგდან დასავლეთიდან გაჩნდა კითხვები, ეს ყველაფერი ხომ არ იყო დაკავშირებული პოლიტიკურ პროცესთან. ეს რეზონანსი თავის დროზე არ იყო გათვალისწინებული და გათვლილი . მიზანი იყო ის რომ , რაც შეიძლება სწრაფად მომხდარიყო ალასანიას დისკრედიტაცია და ამ დისკრედიტაციას ჰქონოდა ბრალეული ფორმულირებები, რომ ის დადანაშაულებული ყოფილიყო კორუფციაში და ამის შემდეგ , თუკი ხმას ამოიღებდა ალასანია, გაამწესებდა მას იქ , სადაც დღეს ახალაიაა. ეს პროცესი დროებით გაჩერდა იმის გამო, რომ პროცესი აღმოჩნდა ძალიან ხმაურიანი. იმის გამო რომ არ ყოფილიყო მხოლოდ პროკურატურის მიერ გამომცხვარი ბრალდებები საჭირო გახდა ინსტიტუტების ჩასრთვა. ამ თვალსაზრისით გამოყენებული იქნა აუდიტის სამსახური, რომელიც ექვემდებარება პარლამენტს.

ეჭვი არ მეპარება , რომ ე.წ კაბელების საქმე პროკურატურას წაგებული აქვს. შეხედეთ , როგორ გააძლიერა ალასანიამ ტემბრი, ტონალობას აუწია, უკვე თითს იქნევს, გამოუშვით კაბელებზე დაჭერილი ხალხი თორემოო... თქვენ გგონიათ ეს ყველაფერი შემთხვევით არის?! როცა პოლიტიკურ ფიგურას ირჩევ სამიზნედ , მეტი უნდა გესმოდეს ამ საქმეში. ალასანიას წინააღმდეგ მანქანა ჩართულია, მაგრამ ეს მანქანა უკვე მოშლილია და არ არის მწყობრი სისტემა იმისთვის , რომ მანქანამ მოძრაობა დაიწყოს.“ აცხადებს ვალერი გელბახიანი გაზეთ „ალიასთან“ ინტერვიუში.

წყარო გაზეთი "ალია"