საქართველოს პრეზიდენტის, გიორგი მარგველაშვილის სიტყვით გამოსვლას კანონმდებლების წინაშე, ექსპერტი გია ხუხაშვილი აფასებს. „ნიუპოსტთან“ საუბრისას ხუხაშვილმა აღნიშნა, რომ პრეზიდენტმა მიმართვის დროს მთავარი აქცენტები დააყენა და მიიტანა უმაღლეს საკანონმდებლო ორგანომდე:

„პრეზიდენტმა მთავარი აქცენტები დააყენა, რა პრობლემებიც დღეს ქვეყანაში არსებობს. მნიშვნელოვანი იყო ის, რომ ხაზგასმით აღნიშნა, რომ კურსთან დაკავშირებით პრობლემა არ არის და სპეკულაცია ამ თემაზე არ იყო საგნობრივი. ევროპა არ გახლავთ ჩვენი გეოგრაფიული არჩევანი, ეს არის ფასეულობათა გარკვეული სისტემა, რომლის დამკვიდრების საფუძველზეც უნდა შევუერთდეთ ამ სამყაროს. ეს არის ინსტიტუციურ მართვაზე გადასვლა, ეს არის ადამიანის ფუნდამენტური უფლებები, პოლიტიკური კონკურენცია, სახელმწიფო ინსტიტუტების გამართული მუშაობა. შესაბამისი რეფორმებია ჩასატარებელი და პრეზიდენტმა სწორედ ამაზე ისაუბრა, აბსოლუტურად სწორი აქცენტები დააყენა ამ თემებთან დაკავშირებით.

რაც შეეხება პრეზიდენტის ფრაზას, „ვერ მოხერხდება ორი ბატონის მსახურება“, გამგები გაიგებს, ძალიან მარტივი გასაგებია, ეს იყო ინსტიტუციურ მართვასთან დაკავშირებით. ბიბლიიდან მოტანილი ფრაზა, ინსტიტუციურ მართვაზე უნდა გადავიდეთ, სახელმწიფო უნდა იმართებოდეს არა პოლიტიკური ჯგუფების მხრიდან, ან პიროვნებიდან გამომდინარე, არამედ ინსტიტუტების პატივის ცემის, მათი კანონთან შესაბამისობაში მოტანის საფუძველზე. ეს იგულისხმა პრეზიდენტმა. ის ინსინუაციები, რომ კონკრეტული პერსონები ჰყავდა მხედველობაში, ასე ნამდვილად არ არის. ეს ეხებოდა ყველას მეტნაკლებად. ჩვენი საზოგადოება მიჩვეულია პიროვნებაზე ორიენტირებულ მართვას და ნელ-ნელა უნდა გადავიდეთ ინსტიტუციონალურ მართვაზე.

მე ვფიქრობ, მან სწორად მიიტანა და სწორად წარმოადგინა ის ამოცანები, რაც ქართულ სახელმწიფოს გასავლელი აქვს იმისათვის, რომ ევროპისკენ მიმავალი გზა ნორმალურად დავფაროთ“, - განაცხადა გია ხუხაშვილმა „ნიუპოსტთან“ საუბრისას.