საქართველოს შიდა პოლიტიკური ვითარება იქნება განხილვის მთავარი თემა ასოცირების საბჭოს პირველივე სხდომაზე ბრიუსელში, რომელიც 17 ნოემბერს არის დაგეგმილი, უკვე ცნობილია, რომ ამ შეხვედრაზე, რომელსაც ირაკლი ღარიბაშვილი დაესწრება, მინისტრების გადადგომაზე, აფხაზეთის ხელშეკრულების გაფორმებასა და შერჩევით სამართალზეც ისაუბრებენ.

ამ სხდომამდე კი ევროატლანტიკურ ინტეგრაციაზე იმსჯელეს მარტენის ცენტრში გამართულ კონფერენციაზე, ევროპელი ექსპერტები და პოლიტიკოსები ბოლო დღეებში საქართველოში განვითარებული მოვლენების ფონზე დაინტერესდნენ, შეიძლება თუ არა საქართველომ ევროპული კურსიდან გადაუხვიოს.

„ბატონი ივანიშვილი არის რისკი საქართველოს მომავლისთვის ევროპაში და ქართული საზოგადოებისთვის. ვიქნებით ღია დემოკრატიული საქართველოსთვის, სადაც სამართლის უზენაესობაა. ჩვენ ვერ შევეგუებით შერჩევით სამართალს, რომელსაც ბატონი ივანიშვილი ახორციელებს, მიუხედავად იმისა რომ ის უკანა პლანზე იმალება“-აღნიშნა ევროპარლამენტის წევრმა.