საქართველოს თავდაცვის ყოფილი მინისტრი, ირაკლი ალასანია პრეზიდენტ გიორგი მარგველაშვილს შეხვდა. შეხვედრა პრეზიდენტის სასახლეში შედგა. გიორგი მარგველაშვილთან საუბრის შემდეგ, ირაკლი ალასანიამ ჟურნალისტებისთვის კომენტარი გააკეთა:

„საქართველოს პრეზიდენტთან შეხვედრა დაგეგმილი გვქონდა და ერთმანეთს გავუცვალეთ მოსაზრებები, შეფასებები შექმნილ პოლიტიკურ ვითარებაზე ქვეყანაში, მე ბუნებრივია მქონდა მოსახსენებელი ის თემები, რომელიც დაწყებული იყო თავდაცვის სამინისტროში, რომლის საქმის კურსშიც იყო პრეზიდენტი და იმედი გამოვთქვით, რომ ეს ყველაფერი გაგრძელდება, იმიტომ რომ უკავშირდება სწორედ იმ მთავარ ამოცანას, ეროვნულ ამოცანას, რომ ევროპისა და ევროატლანტიკური სივრცის ნაწილი გავხდეთ, სამხედრო ძლიერებაზე, ჩვენი თავდაცვისუნარიანობის გაძლიერებაზე გვქონდა საუბარი.

ბუნებრივია, იმედი გამოვთქვით, რომ სასამართლო და გამოძიება წარიმართება, ახლა უკვე საზოგადოებისთვის ცნობილ საქმეებზე, ღიად და ობიექტური ჭეშმარიტება დადგება, საზოგადოება კი დაინახავს თუ რა მიღწევები ჰქონდა თავდაცვის სამინისტროს ბოლო ორი წლის განმავლობაში.

ვისაუბრეთ ასევე იმაზე, რომ ჩვენს ქვეყანაში აუცილებელია პოლიტიკური ძალები, განსაკუთრებით პროდასავლური პოლიტიკური ძალები გაძლიერდეს და ქვეყანამ გააძლიეროს ინსტიტუტები და ინსტიტუტები იღებდეს მონაწილეობას ქვეყნის მართვაში“, - განაცხადა ირაკლი ალასანიამ.