პრეზიდენტის ადმინისტრაცია "უსინათლოთა კავშირთან" თანამშრომლობისთვის მზადყოფნას გამოთქვამს. ამის შესახებ გიორგი მარგველაშვილმა უსინათლოთა კავშირის წევრებთან შეხვედრისას განაცხადა.

მისი თქმით, გაგრძელდება მუშაობა იმისთვის, რომ უსინათლო ადამიანების პირობები გაუმჯობესდეს.

პრეზიდენტმა დღევანდელ შეხვედრაზე უსინათლოთა კავშირის ბაზაც ნახა, სადაც აღწერილია ადამიანების უნარები და დასაქმების შესაძლებობები.

"ასეთი ბაზით პრეზიდენტის ადმინიტრაციაც დაინტერესდება. თუ ადმინისტრაციაში არსებული ვაკანსიები თანხვედრაშია თქვენი ბაზის ადამიანების უნარებთან ან მათ სამუშაო ინტერსებთან, ჩვენ დავინტერესდებით და აქედანვე შეგვიძლია დავიწყოთ კონკრეტული თანამშრომლობა", - განაცხადა გიორგი მარგველაშვილმა.

პრეზიდენტი დღეს უსინათლოთა კავშირში მეუღლესთან, მაკა ჩიჩუასთან ერთად იმყოფებოდა.

„არაჩვეულებრივად ხატავენ, მათი ხელნაკეთი ნივთებიც ვნახე. მიმაჩნია, რომ შესაძლოა ეს ადამიანები შეზღუდული შესაძლებლოებების მქონეები სხვა მიმართულებით იყვნენ, მაგრამ რასაც ისინი აკეთებენ, აქედან გამომდინარე მათ ნამდვილად მაღალი დონის შესაძლებლობები აქვთ", - განაცხადა მაკა ჩიჩუამ.