ფრაქცია „ქართული ოცნების“ წევრი თამარ კორძაია არ იზიარებს ამავე ფრაქციის წევრის ზაქარია ქუცნაშვილის მოსაზრებას იმის შესახებ, რომ საქართველოს პრეზიდენტის პარლამენტში მისვლას აზრი არ აქვს.

„პრეზიდენტს ნებისმიერ დროს აქვს უფლება, პარლამენტს მიმართოს. მე ვფიქრობ, ის საქართველოს უმნიშვნელოვანეს საკითხებზე აკეთებს მიმართვას და ჩვენ უნდა მივესალმოთ მის მაღალსახელმწიფოებრივ დამოკიდებულებას ევროინტეგრაციის საკითხებთან დაკავშირებით. რაც შეეხება ჩემი კოლეგის ქუცნაშვილის პოზიციას, მე რა თქმა უნდა ამ შემთხვევაში არ ვიზიარებ“, – ამბობს თამარ კორძაია

ზაქარია ქუცნაშვილის თქმით, ის საქართველოს პრეზიდენტის გიორგი მარგველაშვილის პარლამენტში მისვლის აზრს ვერ ხედავს.

„თუ პრეზიდენტი აღარ მიიჩნევს, რომ საქართველომ ევროატლანტიკურ კურსს გადაუხვია, ამ შემთხვევაში მის მიმართვას საფუძველი აღარ აქვს“, – განაცხადა ქუცნაშვილმა.

საქართველოს პრეზიდენტი გიორგი მარგველაშვილის პარლამენტში სიტყვით გამოსვლა ხვალ, 12:00 საათზეა დაგეგმილი.