საპარლამენტო კვოტების საკითხს უმრავლესობა მომდევნო კვირიდან მიუბრუნდება. საკითხს უმრავლესობის სხდომის ფორმატში განიხილავენ და გადაწყდება შეინარჩუნებენ, თუ - არა თანამდებობებს "თავისუფალი დემოკრატები". ასევე, პოსტიდან გადაყენების შემთხვევაში, ვინ იქნება მათი შემცვლელი.

საუბარია ოთხ თანამდებობაზე, მათ შორის, სამი კომიტეტის თავჯდომარის და ერთი ვიცე-სპიკერის, რომელზეც გია ვოლსკის კანდიდატურა დასახელდა. თავად ვოლსკი ამ ინფორმაციას უარყოფს.

„ხალხი ცდილობს ამ თემასთან დაკავშირებით რაღაც ლოგიკა დაიჭიროს, მაგრამ მე ვფიქრობ, საკმაოდ სერიოზული პოსტი მიკავია და ეს საკითხი არ განიხილება", - განაცხადა გია ვოლსკიმ.

ვოლსკის ვიცე-სპიკერის თანამდებობაზე დანიშვნის შესახებ ინფორმაცია არ დაადასტურა არც მანანა კობახიძემ. გადაცემა „არჩევანში“ მან განაცხადა, რომ აღნიშნული საკითხზე საუბარი არც უმრავლესობის ფორმატში ყოფილა.

რეგლამენტით ვიცე-სპიკერის პოსტი უმრავლესობას ეკუთვნის.