ვინმეს სჯერა, რომ ბ-ნ ქეცბაიას მიერ პოსტის დატოვებას ნაკრების კარგი თამაში მოჰყვება?

ვინმეს სჯერა, რომ ბ-ნ ქეცბაიას მიერ პოსტის დატოვებას ნაკრების კარგი თამაში მოჰყვება? - გრიგოლ ვაშაძე

სოც.მედია - 01:08, 12 Nov, 2014

3153

საგარეო საქმეთა ყოფილი მინისტრი, საზოგადოება ,,ივერიას“ დამფუძნებელი გრიგოლ ვაშაძე სოციალურ ქსელში სპორტის თემას ეხმაურება და ქართულ ფეხბურთში არსებულ პრობლემებზე წერს. გრიგოლ ვაშაძე მიიჩნევს, რომ თემურ ქეცბაიას მიერ პოსტის დატოვება არ არის გამოსავალი და მისი ლანძღვის შემდეგ არცერთი წარმატებულ ქართველს არ მოუნდება სამშობლოში მოღვაწეობა.

,,ერთი კვირაა არ ვარ საქართველოში, ამიტომ ბ-ნ თემურ ქეცბაიას ინტერვიუს მოსმენამ დაგვიანებით მომიწია.

მე პირადად რამდენიმე შეკითხვა დამებადა.

მართლა სჯერა ვინმეს, რომ ბ-ნ ქეცბაიას მიერ პოსტის დატოვებას ნაკრების კარგი თამაში მოჰყვება? არა, მართლა გჯერათ?

შეიძლება იქ, სადაც გაცხარებული ბუკმეკერული აღებ-მიცემობა მიდის, სადაც 18-19 წლის ნიჭიერ ბავშვებს საზღვარგარეთ მესამეხარისხოვან კლუბებში ყიდიან, რაც კარიერის დამამთავრებელი ტრავმებით მთავრდება, სადაც ფული თუ არა გაქვს, ბავშვს სექციაში ვერ მიიყვან, სადაც მატჩის დროს ცემა-ტყეპა რიგითი მოვლენაა, მაგარი ფეხბურთის თამაში დაიწყოს, წავა თუ არა ქეცბაია?

თუ, დავუშვათ, ნაკრების მწვრთნელი არ იმსახურებს თავის ხელფასს, ვინმეს სჯერა, რომ "ჩვენი" ფეხბურთი გადასახადის გადამხდელის ჯიბიდან ამოღებულ 7 მილიონიან დოტაციას იმსახურებს?

სჭირდება ვინმეს "პროფესიული" საფეხბურთო ლიგა, რომელსაც თითქმის მთლიანად სახელმწიფო (ანუ ჩვენ!) აფინანსებს?

ქეცბაიას (და არა მარტო!) ლანძღვა-გინების შემდეგ, რამდენ წარმატებულ ქართველს მოუნდება სამშობლოში დაბრუნება და აქ მოღვაწეობა?

და ასე შემდეგ...

მაქვს წინადადება: ფული გადავამისამართოთ რაგბში და კალათბურთში, და ვისაც ფეხბურთი უნდა, იყვნენ ცოტა ხნით თავისი ენთუზიაზმის ამარა, გვაჩვენონ, რა შეუძლიათ.

და იქნებ სახელიც გამოგვეცვალა სპორტისთვის, თორემ უხერხულია, ესპანეთშიც ფეხბურთი ერქვას და ჩვენთანაც“, - წერს გრიგოლ ვაშაძე.