რუსეთის ჯავახკის დიასპორა მიიჩნევს, რომ საქართველო სახელმწიფოებრიობის დაკარგვის და დაშლის საფრთხის წინაშეა. ამასთან დაკავშირებით დიასპორა სპეციალურ განცხადებას ავრცელებს, დიასპორა თვლის, რომ სახელმწიფო გადატრიალების შემთხვევაში სამცხე-ჯავახეთი სუვერენულ ტერიტორიად უნდა გამოცხადდეს.

"ძვირფასო თანამემამულენო!

საქართველო საფრთხეშია! ჩვენ საჯაროდ და არაერთხელ გაფრთხილებდით საქართველოს მიერ სახელმწიფოებრიობის დაკარგვის და მისი დაშლის საფრთხეზე და აი, უკვე სახეზეა ამის გარკვეული აშკარა ნიშნები. ყველასთვის ნათელია, რომ ქვეყნის მტრების მიერ შემუშავებულია მოქმედებათა გეგმა ქვეყანაში პოლიტიკური კრიზისის ინიცირების, ხელისუფლების შეცვლისა და ვადამდელი საპარლამენტო არჩევნების დასანიშნად. საქართველოში ახლოვდება ახალი რევოლუცია, ან გულწრფელად რომ ვთქვათ - სახელმწიფო გადატრიალება, რაც ქვეყანას აპრიორი საბოლოო გაქრობისკენ მიიყვანს.

ამასთან დაკავშირებით მოგიწოდებთ:

ა) ყველა საშუალებით და ხერხით დაუჭიროთ მხარი საქართველოს მთავრობას ირაკლი ღარიბაშვილის მეთაურობით; არ აყვეთ პროვოკაციულ მოწოდებებს და უარი თქვათ ყველა სახის მასობრივ შეკრებებსა და საპროტესტო აქციებში მონაწილეობაზე, რომლებიც ინსინუირებულია მოსყიდული ქართველის ან სხვა ლიბერასტების მიერ;

ბ) საქართველოში სახელმწიფო გადატრიალების შემთხვევაში, სამცხე-ჯავახეთის მხარის ტერიტორია გამოცხადდეს სუვერენულ ტერიტორიად, რომელიც არ განეკუთვნება არცერთ სახელმწიფოს;

- ხელისუფლების ახალი, ლეგიტიმური ორგანოების ფორმირებამდე შეიქმნას მხარის დროებითი აღმასრულებელი ხელისუფლების ორგანოები;

- უარი ითქვას დასავლეთის მიერ დანერგილ და იძულებით თავსმოხვეულ ე.წ. კოჰაბიტაციაზე და დაიშალოს მხარეში მოქმედი ყველა პოლიტიკური პარტია;

- განხორციელდეს საჯარო ლუსტრაცია და მკაცრი პასუხისმგებლობა დაეკისროს ყველა იმ პირს, ვინც დამნაშავეა ქვეყნის დაშლაში", - წერია განცხადებაში.

როგორც ორგანიზაციის პრეზიდენტი აგას არაბიანი აცხადებს, „მოსალოდნელია, საქართველოში მოვლენები მაიდნის სცენარით განვითარდეს, ამიტომ ქართველები ბოლო დროს გახშირებულ პროვოკაციებს არ უნდა აჰყვნენ“.

„ჩვენი ორგანიზაცია და ჩვენი მეგობრები, რომლებიც მოსკოვში ვიმყოფებით, ვთვლით, რომ საქართველო ღრმა სამოქალაქო კრიზისის წინაშე დგას, ამიტომ ვშიშობთ, რომ საქართველოში მალე მოხდება მაიდნის ანალოგი, რასაც საქართველო ვერ გაუძლებს და დაიშლება. თუ ეს მოხდება, ისმის კითხვა, რა მოხდება სამცხე–ჯავახეთში. თუ სამოქალაქო ომი დაიწყება, ამით ისარგებლებს თურქეთი. ისინი გამოიყენებენ ყარსის შეთანხმებას, რომლის მიხედვითაც თურქეთს აქვს აჭარის ანექსირების უფლება და მეორე, თურქეთი მოისურვებს სამხცხე–ჯავახეთში შემოსვლას ვითომდა ამ ტერიტორიაზე გამავალი სატრანზოტო მაგისტრალების დაცვის მიზნით, ამიტომ ჩვენ ჩვენს ძმებს, თანამოქალაქეებს მოვუწოდებთ, არ შეუერთდნენ არანაირ მიტინგებსა და გამოსვლებს, რომელთაც საქართველოში სხვადასხვა პოლიტიკური ძალები გეგმავენ. ჩვენ მხარს ვუჭერთ ღარიბაშვილის მთავრობას. ჩვენ მზად ვართ, მხარში დავუდგეთ მოქმედ ხელისუფლებას და დავეხმაროთ იმაში, რომ არანაირ სახელმწიფო გადატრიალებებსა და რევოლუციას ადგილი არ ჰქონდეს“,- განაცხადა აგას არაბიანმა.