საქართველოს საგარეო საქმეთა ყოფილი მინისტრის პირველი მოადგილე, დავით ზალკალიანი, აცხადებს, რომ ოპონენტები მათი განცხადებების არასწორ ინტერპრეტაციას აკეთებენ. დავით ზალკალიანმა „კვირის პალიტრასთან“ საუბრისას განაცხადა, რომ ქვეყნის ევროატლანტიკურ ინტეგრაციას საფრთხე ექმნება:

„ჩვენი ოპონენტები აკეთებენ გარკვეული განცხადებების ინტერპრეტაციას. თითქოს, ჩვენ განვაცხადეთ, რომ ქვეყნის საგარეო პოლიტიკური ორიენტაცია იცვლება. მსგავსი რამ არ გვითქვამს. ჩვენ განვაცხადეთ, რომ საფრთხე ექმნება ევროატლანტიკურ ინტეგრაციას.

თავდაცვის სამინისტროს შესყიდვები ნატო-მ და პარტნიორებმა შეაფასეს, როგორც ერთერთი სამაგალითო. ეს უწყება არის ყველაზე წარმატებული რეფორმების გატარების თვალსაზრისით. საფრანგეთში ვიზიტისას განხილულ იქნა საქართველოს თავდაცვისუნარიანობის განმტკიცების საკითხები და სწორედ ამ დროს დარტყმის მიყენება თავდაცვის უწყებაზე, ნამდვილად დიდ საფრთხეს უქმნის ჩვენი ქვეყნის ევროინტეგრაციის პროცესს. თუნდაც, ე.წ. კაბელების საქმე დაკავშირებულია ჩვენი ქვეყნის თავდაცვისუნარიანობასთან, ისმის კითხვა: რატომ ხდება სწორედ ამ ეტაპზე ასეთი თემების გამოტანა? ვის აწყობს ეს? საკმაოდ ბევრ ეჭვს ბადებს ეს ყველაფერი“, - აცხადებს დავით ზალკალიანი „კვირის პალიტრასთან“ საუბრისას.