„მე, 300 არაგველის შთამომავალი ვარ და ჩემი გადაბირება შეუძლებელია!“, - ამის შესახებ „ლეიბორისტული პარტიის“ ლიდერმა შალვა ნათელაშვილმა „რეაქციის“ ეთერში გადაცემის წამყვანის კითხვის საპასუხოდ განაცხადა.

ნათელაშვილი ბოლო დროს განვითარებულ მოვლენებს გამოეხმაურა და აღნიშნა, ქვეყანაში დასავლეთსა და რუსეთს შორის გავლენის გადანაწილებისთვის ბრძოლა მიმდინარეობს.

„ის რაც ხდება ეს არის გეოპოლიტიკის ასახვა. ეს არ უკავშირდება არც ალსანიას, არც პეტრიაშვილს და არც ფანჯიკიძეს. ეს არის დასავლეთსა და რუსეთს შორის გავლენის გადანაწილებისთვის ბრძოლა, ბრძოლა თუ ვის დარჩება ევრაზიის პლიტა და ვის დარჩება ციმბირი თავისი უზარმაზარი რესურსებით. დღეს კრემლი გააღიზიანა საქართველოს ხელისუფლებაში ძალოვან თანამდებობაზე პროდასავლური მინისტრის ყოფნამ. რუსეთს უნდა ამერიკის კონტროლს გამოაცალოს ევროპა და ჩვენ ამ ბრძოლაში ვართ ჩართული. საქართველო ამ ბრძოლაში შაგრენის ტყავივით პატარავდება, ვინაიდან საქართველოს გამსახურდიას გარდა გარედან მართავდი ხელისუფლება ჰყავდა. 90-იანი წლებიდან 2003 წლამდე საქართველოს ძალოვან სტრუქტურებს მოსკოვიდან დანიშნული კადრები ხელმძღვანელობდნენ“,- განაცხადა ნათელაშვილმა.

„თქვენ რომ მოსკოვში გაქვთ დამთავრებული უნივერსიტეტი არაფერს ნიშნავს? თქვენც მოსკოვის სკოლა გაქვთ გავლილი“, - მიმართა ინგა გრიგოლიამ ნათელაშვილს.

„მე, 300 არაგველის შთამომავალი ვარ და ჩემი გადაბირება შეუძლებელია!“,- უპასუხა „ლეიბორისტების“ ლიდერმა.