ხაჯიმბა - რუსეთთან ხელშეკრულების პროექტი უკვე მზად არის (ვიდეო)

პოლიტიკა - 17:37, 07 Nov, 2014

1793

6 ნოემბერს ე.წ. "აფხაზეთის ტელერადიოკომპანიის" წარმომადგენლებთან ინტერვიუში რაულ ხაჯიმბა აცხადებს, რომ რუსეთთან ხელშეკრულების პროექტი უკვე მზად არის. მისი თქმით, თავდაპირველ პროექტში ბევრი რამ იყო ისეთი, რაც აფხაზი ხალხის ინტერესებში არ შედიოდა, თუმცა ხელშეკრულება გადამუშავდა და ამჟამად მან ჩამოყალიბებული დოკუმენტის სახე მიიღო.

მისი თქმით, ხელშეკრულება უკვე გადაეგზავნა რუსეთის შესაბამის უწყებებს და ახლა მათზეა დამოკიდებული, თუ რამდენად სწრაფად მოხერხდება მისი ხელმოწერა.

ხაჯიმბას თქმით, გასათვალისწინებელია ის მომენტიც, რომ რუსეთშიც არსებობს აზრთა სხვადასხვაობა და პროცესები იქაც რთულად მიმდინარეობს. ამას აფხაზი ხალხი გაგებით უნდა მოეკიდეოს, რადგან ეს დოკუმენტი პირველ რიგში აფხაზეთს სჭირდება.

"ჩვენი ქვეყანა მჭიდროდაა მიბმული რუსეთთან, თუნდაც ფინანსურ საკითხებში და ამ პროცესებიდან მკვეთრი გამოსვლა შეუძლებელია," - აცხადებს ე.წ. პრეზიდენტი.

მისი განცხადებით, ის ხალხი, ვინც საერთოდ ეწინააღმდეგება ამ დოკუმენტის ხელმოწერას, მერკანტილური და კერძო ინტერესებით ხეკლმძღვანელობს.

იგი ასევე დიდ იმედებს ამყარებს ამ დოკუმენტით გათვალისწინებულ ე.წ. უსაფრთხოების საკითხებს და მიიჩნევს, რომ დოკუმენტი ხელს შეუწყობს "აფხაზური არმიის" მოდერნიზაციას და თანამედროვე სახის შეიარაღებულ ძალებად ჩამოყალიბებას. ამას, ხაჯიმბას თქმით დიდი ფინანსები სჭირდება, რის მიღებასაც იგი რუსეთისაგან აპირებს. რაც შეეხება რუსეთის სამხედრო ნაწილების ყოფნას აფხაზეთის ტერიტორიაზე, ეს ფაქტი აუცილებელია აფხაზეთის თავდაცვის ჭრილში იქნას განხილული.

"დღევანდელ დღეს საფრთხე რეალურად არსებობს და ჩვენ მზად უნდა ვიყოთ ამისთვის," - აცხადებს ხაჯიმბა.