აფხაზეთთან სარკინიგზო მონაკვეთის აღდგენის საკითხი მალე გადაწყდება. ამის შესახებ ინფორმაციას სომხეთის ტრანსპორტის მინისტრის პირველი მოადგილე ავრცელებს.

არტურ არაქელიანის თქმით აფხაზეთის რკინიგზის ფუნქციონირების აღდგენასთან დაკავშირებით მისი უწყების მონაწილეობით დახურული მოლაპარაკებები უკვე მიმდინარეობს და სომხური, რუსული და ქართული მხარეები ამ პროგრამას უდიდეს მნიშვნელობას ანიჭებენ.

არაქელიანის შეფასებით ბოლო პერიოდში გაიზარდა დამაიმედებელი განცხადებები ამ მიმართულებით, მათ შორის რუსეთის სარკინიგზო ხაზების პრეზიდენტის მხრიდანაც. მინისტრის პირველი მოადგილის თქმით აფხაზეთის რკინიგზის ფუნქციონირების აღდგენის საკითხი უფრო მეტად პოლიტიკურია, ვიდრე ეკონომიკური.

უფუნქციო სარკინიგზო ხაზი კი მისი ვარაუდით შესაძლოა მას შემდეგ აღდგეს, რაც საკითხის პოლიტიკური მხარე გადაწყდება.