საქართველოში განვითარებულ მოვლენებს და ყოფილი ხელისუფლების წევრების მიმართ დაწყებულ გამოძიებებს, ამერიკის შეერთებული შტატების სახელმწიფო დეპარტამენტში კიდევ ერთხელ გამოეხმაურნენ.

უწყების პრესმდივნის განცხადებით, ერთდროულად მიმდინარე რამდენიმე სასამართლო პროცესი ბადებს ეჭვს, რომ ქვეყანაში შესაძლოა, ადგილი ჰქონდეს პოლიტიკურ ანგარიშსწორებას.

ფსაკიმ კიდევ ერთხელ გაიმეორა, რომ არსებული რეგიონული და შიდა ეკონომიკური გამოწვევების ფონზე, საქართველოს სტაბილურობა განსაკუთრებით ესაჭიროება.

მან ქვეყნის მთავრობას მოუწოდა, გამოირიცხოს ყოველგვარი მოსაზრება პოლიტიკურად მოტივირებული პროცესების შესახებ. ფსაკის თქმით, ადმინისტრაცია არ მიიჩნევს, რომ საქართველო არჩეული გზიდან უხვევს, თუმცა, ის მოვლენები, რაც ქვეყანაში ვითარდება ამ პროცესს სერიოზულ პრობლემებს უქმნის. მისივე თქმით, ვაშინგტონს სურს, რომ საქართველომ წარმატების გზა განაგრძოს და ლიდერებმა ერთად იმუშაონ ქვეყნის მომავლისთვის.

„რა თქმა უნდა როცა ერთად მიმდინარეობს რამდენიმე ერთდროული გამოძიება მთავრობის წევრებისა და ამჟამინდელი ოპოზიციონერების წინააღმდეგ, ეს ბადებს სერიოზულ ეჭვებს, რომ ქვეყანაში პოლიტიკური ანგარიშსწორება ხდება. ძალიან მნიშვნელოვანია, გამოირიცხოს ისეთის აღქმა, რომ სასამართლო სისტემის პოლიტიკურად და პოლიტიკური მიზნებისთვის გამოყენება ხდება. ჩვენ პრემიერმინისტრის კომენტარები მოვისმინეთ და ფაქტი არის ის, რომ გამოძიება ყოფილი მაღალჩინოსნების მიმართ კიდევ გრძლედება, ვფიქრობ ამ შემთხვევაში საქმე უფრო ხმამაღლა მეტყველებს, ვიდრე სიტყვები“, - განაცხადა ჯეინ ფსაკიმ.