პრეზიდენტის ადმინისტრაცია, გიორგი მარგველაშვილის განცხადების შესაბამისად, მიმართავს პარლამენტს, რომ უახლოეს პლენარულ სხდომაზე პრეზიდენტის სიტყვით გამოსვლა ჩანიშნოს. ამის შესახებ პრეზიდენტის ადმინისტრაციის უფროსმა დავით პატარაიამ განაცხადა.

მისი განმარტებით, კონსტიტუციის 73-ე მუხლის მე-4 პუნქტის პირველი წინადადების შესაბამისად, პრეზიდენტი უფლებამოსილია ხალხს და პარლამენტს მიმართოს.

„უახლოეს დღეებში ოფიციალურად პარლამენტს თხოვნით მივმართავთ, რომ რომელიმე პლენარული სხდომის დღის წესრიგში გათვალისწინებული იქნას პარლამენტისადმი პრეზიდენტის მიმართვა. საუბარი არ არის ყოველწლიურ მოხსენებაზე. მისი პროცედურები რეგულირდება და როგორც წესი, წელიწადში ერთხელ საგაზაფხულო სესიის დაწყების დროს ხდება. გიორგი მარგველაშვილის მიერ მოთხოვნილი მიმართვა წარმოადგენს პრეზიდენტის კონსტიტუციურ უფლებას. შესაძლოა ეს უფლება-მოსილებები პარლამენტის რეგლამენტში პირდაპირ არაა გაწერილი, მაგრამ საკანონმდებლო ორგანოს ბიურო ის ორგანოა, რომელიც პარლამენტის პლენარული სხდომის დღის წესრიგის შედგენისა და ნებისმიერი საკითხის დღის წესრიგში ჩასმას წყვეტს“, - განაცხადა დავით პატარაიამ.

მისივე თქმით, მოთხოვნა გაეგზავნება მთავრობის ადმინისტრაციასაც. ამ შემთხვევაშიც პრეზიდენტი უფლებამოსილია, მთავრობას თხოვნით მიმართოს, რომ სხდომის დღის წესრიგში გათვალისწინებული იქნას ცალკეული საკითხი.