ტოვებს თუ არა"თავისუფალი დემოკრატების" ოზურგეთის რაიონული ორგანიზაცია პარტიას?

პოლიტიკა - 13:02, 06 Nov, 2014

2048

"თავისუფალი დემოკრატების" ოზურგეთის რაიონული ორგანიზაცია პარტიას ტოვებს და "ქართულ ოცნებაში" გადადის, - ამის შესახებ განცხადება დღეს გამართულ საგანგებო ბფირინგზე "თავისუფალი დემოკრატების" ერთ ერთმა დამფუძნებელმა, პარტიის ოზურგეთის რაიონული ორგანიზაციის თავმჯდომარემ და ოზურგეთის მუნიციპალური საკრებულოს თავმჯდომარის მოადგილემ, დიმიტრი კვერღელიძემ გააკეთა.

მისივე განცხადებით, პარტია მთლიანად დატოვა ოზურგეთის საკრებულოს ფრაქციის ოთხმა დეპუტატმა და პარტიის უმრავლესობამ.

კვერღელიძემ, უპასუხისმგებლო უწოდა ალასანიას გუნდის გუშინდელ გადაწყვეტილებას კოალიციის დატოვებასთან დაკავშირებით. მისი თქმით, ხალხისთვის გაცემული დაპირებების შესრულებისთვის ბრძოლის გაგრძელება დღეს ყველაზე მთავარია.

თავისუფალი დემოკრატების ოზურგეთის რაიონულ ორგანიზაციაში, პარტიის აწ უკვე თავმჯდომარის, დიმიტრი კვერღელიძის განცხადებას, უმრავლესობის მიერ პარტიის დატოვებასთან დაკავშირებით არ ადასტურებენ.

"არავის ამ წუთისათვის, ვაკონკრეტებ, პარტიის არცერთ წევრს არ მოუმართავს ოფისისთვის განცხადებით, პარტიის დატოვებასთან დაკავშირებით, არანაირ უმრავლესობაზე საუბარი არაა, პარტია მხოლოდ ყოფილმა თავმჯდომარემ, კვერღელიძემ დატოვა" - განუცხადა ,,ნიუპოსტს“ ამავე პარტიის თავმჯდომარის პირველმა მოადგილემ, ირინა კოპალეიშვილმა.

მან უფრო მეტი კონკრეტიკისაგან თავი შეიკავა და აღნიშნა, რომ ვრცელ კომენტარს ამის შესახებ პარტიის ყრილობის (8 ნოემბერი) შემდეგ გააკეთებს.

თეა იოსელიანი, გურა, ,,ნიუპოსტი“