„გულდასაწყვეტია ის, რომ დღეს „თავისუფალმა დემოკარტებმა“ მიიღეს გადაწყვეტილება და დატოვეს კოალიცია“, - ამის შესახებ განცხადება ვიცე-პრემიერმა კახი კალაძემ განაცხადა.

„ნამდვილად გულდასაწყვეტია ის, თუ როგორ განვითარდა ბოლო დღეების განმავლობაში მოვლენები. გულდასაწყვეტია ის, რომ დღეს „თავისუფალმა დემოკარტებმა“ მიიღეს გადაწყვეტილება და დატოვეს კოალიცია. მე ადამიანურად გული დამწყდა, რადგან ამ ადამიანებთან ერთად 2 წლის განმავლობაში მძიმე დღეები გამოვიარეთ. რთული იყო წინა ხელისუფლების პირობებში საარჩევნო კამპანიის ჩატარება და ჩვენ გვახსოვს, თუ როგორი ზეწოლა მიმდინარეობდა განსხვავებული აზრისა და შეხედულებების მქონე ადამიანზე“, - განაცხადა კახი კალაძემ.

რაც შეეხება პოლიტსაბჭოს სხდომაზე ბიძინა ივანიშვილის ყოფნას, მისი თქმით, ყოფილი პრემიერი იქ კოალიციის მოწვევით იმყოფებოდა. მისი თქმით, სწორედ ივანიშვილის კითხვებმა გამოიწვია „თავისუფალი დემოკრატების“ გაღიზიანება.

„თვითონ გაღიზიანება რამ გამოიწვია, ეს იყო კონკრეტული კითხვები, რომელიც დასვა ბატონმა ბიძინა ივანიშვილმა და მე მინდა გითხრათ, რომ ბიძინა ივანიშვილი მოწვეული იყო ჩვენი ინიციატივით, რადგან ის გახლდათ ამ კოალიციის დამფუძნებელი და როდესაც ჩვენ დავიწყეთ ბრძოლა წინა ხელისუფლების წინააღმდეგ, რომელზეც ჩვენი ქვეყნის მოსახლეობა ძალიან იყო განაწყენებული. ზუსტად მთელი საზოგადოება, ის პოლიტიკური ძალები, რომლებიც კოალიციის წევრები არიან, გავერთიანდით ამ ადამიანის ირგვლივ. ამის გამო იყო მოწვეული ბატონი ბიძინა და გაღიზიანება გამოიწვია სწორედ იმ კითხვებმა, რომლებიც ეხებოდა კონკრეტულად თავდაცვის სამინისტროში მიმდინარე გამოძიებას“, - განაცხადა კალაძემ.